Gobierno ta brinda yudansa na diferente manera pa enfrenta e crisis di COVID19

Alivio Fiscal, FASE, Sosten Financiero pa Negoshi Chikito y Mediano, Microcredito via Qredits y Subsidio di Salario


For di comienso di e crisis di COVID19 Gobierno di Aruba a tuma e pasonan necesario pa asina por brinda alivio na esnan mas afecta pa e crisis. Gobierno a haci e calculacionnan necesario di e daño financiero y economico cu COVID19 ta trece cune pa Aruba y a base di esaki a cambia Presupuesto 2020 di Pais Aruba. Esaki a bira e base tambe pa Aruba por a busca yudansa financiero na Reino Hulandes pa por brinda alivio na esnan mas afecta y pa sigura cu Aruba su sistema di seguridad social por wanta e efecto di e crisis di COVID19. Na mes momento Gobierno a traha riba yudansa den forma di Alivio Fiscal, FASE, Sosten Financiero pa Negoshi Chikito y Mediano, Microcredito via Qredits y Subsidio di Salario.


Alivio Fiscal
Un di e promer pasonan cu Gobierno a tuma ta pa brinda un flexibilisacion fiscal pa e companianan mas afecta pa e crisis. Pesey a brinda un Alivio Fiscal pa e lunanan di april, mei y juni den cual Departamento di Impuesto lo ta mas flexibel cu pago, areglo di pago, boet y control. Pa mas informacion di e Alivio Fiscal por bishita www.impuesto.aw.


FASE
Mesora Gobierno a cuminsa traha tambe riba e Fondo di Asistencia Social di Emergencia ,FASE, pa asina brinda yudansa na tur esnan cu a perde nan trabou of bay atras den entrada. E yudansa di FASE ta conta tambe pa tur persona cu ta traha riba nan mes. Pa mas informacion riba FASE por bishita www.fasehelpdesk.com.




Sosten Financiero pa Negoshi Chikito y Mediano
Na analogia di e sosten financiero cu na Hulanda a wordo brinda na Midden en Klein Bedrijf, Aruba a traha tambe riba un Sosten Financiero di 4000 florin pa kwartaal pa negoshi chikito y mediano cu ta conta cu menos di 50 empleado. E yudansa aki ta pa
cubri gasto di negoshi. Pa mas informacion por acudi na MiSVB via www.svbaruba.org y Departamento Economico via www.deaci.aw.


Microcredito via Qredits
Pa facilita e companianan chikito y mediano, Gobierno a duna un subsidio di 200.000 florin na e compania di microcredito Qredits pa e por ofrece 100 comerciante chikito y mediano un prestamo cu condicion special pa por surpasa e periodo di COVID19. Cu e subsidio special aki, Qredits lo por duna un credito di un promedio di 25 mil florin cu un periodo liber di pago di 6 luna na un interes di 2% den 12 luna. Pa mas informacion por contact Qredits via www.qredits.com of na aruba@qredits.nl


Subsidio di Salario
Gobierno a traha tambe riba un Subsidio di Salario na analogia di e sosten financiero cu ta wordo brinda den Reino Hulandes na comercio pa nan por tene trahadornan na trabou cu pago di salario. Conseho di Minister di Reino riba 1 di mei a bay di acuerdo pa Gobierno brinda yudansa di un maximo di 60% di pago di salario di e trahador. E negoshinan cu ta bin na remarca pa e yudansa aki lo ricibi un mail di SVB cu informacion riba e condicionnan aplicabel y con pa haci e peticion pa e yudansa di susbsidio di salario. Pa mas informacion acudi na MiSVB via www.svbaruba.org.




Pagonan a cuminsa
Dia 29 di april, Gobierno a cuminsa cu pago di FASE y ya 3134 pago a wordo haci. Den e dianan nos dilanti mas persona cu a aplica pa FASE, lo ricibi nan promer pago. E Sosten Financiero pa Negoshi Chikito y Mediano tambe a keda paga dia 29 di april na 2733 negoshi, faltando algun negoshi cu ta wordo evalua pa bin na remarca pa ricibi e yudansa aki. Awor cu e decicion di Conseho di Minister di Reino riba Aruba su peticion pa brinda yudansa den forma di subsidio di salario ta conoci, e proceso ta cuminsa pa e negoshinan cu ta bin na remarke pa e yudansa aki por cuminsa haya nan promer pago den luna di mei.


Sosten financiero ta wordo evalua
COVID19 ta un crisis sin precedencia alguno pa mundo y tambe pa Aruba. Esaki ta trece cune cu no tin un solucion 'kant en klaar' pa Gobierno implementa, y cada solucion mester wordo evalua a medida cu bin cambio den e situacion di crisis. COVID19 no a bin cu un manual di solucion, pero Gobierno ta haciendo su maximo esfuerso pa trece alivio den e situacion di crisis aki.