Hamas lo lubida tur locual e Soeur y Frèrenan a haci pa Aruba

Minister Glenbert Croes titular di Asunto Social y Labor, desde 2019 ta sea bishitando e Soeurnan cu un tempo a traha na Aruba y cu ainda ta na bida of ta gradiciendo postumamente esunnan cu ya a bay laga nos.


E siman aki e mandatario a bay gradici cu un bunita ofrenda florar, Soeur Dorothea kende tabata e prome cabesante di Kleuterschool Trupial di Santa Cruz, un soeur hopi stima den e bario aki. Acompaña pa docente- y muchanan di Scol Trupial y Pastor Jairo, a bisa e Soeur aki hopi danki pa tur locual cu el a haci pa nos muchanan y pa e impacto positivo cu e tabatin den nan bida. Durante e ceremonia por a scucha algun testimonio di entre otro un ex alumna cu awe ta docente na dicho scol. E tributo di Pastor Jairo tambe tabata hopi emotivo. A probecha mirando cu den mesun kelder ta sosega Pastor Berlage y Pastor Felix, pa rindi tributo na nan tambe. Pa Pastor Felix a invita un representante di e comunidad Filipino den persona di Sra. Martha Hernandez Jiao pa hunto cu Minister Glenbert Croes haci ofrenda floral.


Despues di Santa Cruz a sigui di biaha pa Parokia di Noord unda ta descansa Soeur Enrica kende a traha pa hopi aña na Imeldahof. E ofrenda y tributo aki tabata hopi emotivo tambe en vista cu Sr. Derwin Kemp, e famoso cantante conoci bou di su nomber artistico "Master Gusto", a bin pa rindi homenahe na Soeur Enrica kende a cuid'e, cri'e y stim'e masha hopi mes durante su permanencia den Imeldahof.


Confirmando su compromiso, e mandatario a expresa: "Hamas Aruba lo lubida e gran contribucion y amor pa nos Pueblo. Cu un curason agradecido, e Aruba cu nan a crea awe ta bisa nan: Un gran danki pa tur loke boso a haci y significa pa nos comunidad en especial nos muchanan".


Riba portada un resumen visual di dos momento emotivo y impactante unda cu curason agradecido a bisa danki na dos soeur sumamente importante den cuido di nos muchanan.