HUNTO NOS POR DUNA MAS Un movimiento pa recaudo fondo pa nos muchanan di Imeldahof

​Nos ta den un temporada hopi bunita di aña. Un temporada pa reflexiona, drecha, reenforsa of recontrui lasonan familiar y di amistad. Un temporada pa duna especialmente, na esnan cu mas ta den necesidad. Y hunto nos por duna mas. Diadomingo 22 di December, e prestigioso Partido MEP ta den un movimiento hunto cu pueblo di Aruba pa recaudo fondo pa nos muchanan di Imeldahof. Cada tiki cu nos por brinda un instancia di cuido di mucha asina importante pa nos comunidad, ta un ayudo enorme pa nan.
 
“Hunto nos por duna mas” lo cuminsa pa 6or di atardi y ta bay te 9or di anochi. Bou di animacion musical di Grupo di Betico y Grupo un Brindis, nos lo duna realse na e temporada di mas dushi di aña aki. Un Era Nobo, yuda nos duna mas. Hunto nos por duna mas na nos comunidad. Diadomingo 22 di December, nos ta warda bo na Cede di MEP na Sta. Cruz.