LEY DI ‘MEDEDINGING’ A WORDO APROBA UNANIMENTE DEN PARLAMENTO, Lo pone final na abuso di poder economico y monopolio

E siman aki tawata uno hopi importante pa tur consumidor y pa proteccion di consumidor. Parlamento a aproba e ley di ‘Mededinging’. E ley aki ta pone un final na abuso di poder economico di algun comerciante cu tin posicionnan di monopolio y tambe ta stroba e formacion di cartel. A base di e ley aki, consumidornan mester por haya miho producto y servicio na un prijs hopi mas husto.


Den e ley di ‘Mededinging’ tin un autoridad di competencia tambe, Aruba Fair Trade Authority, AFTA, cu mester supervisa cu tur compania ta cumpli cu tur locual tin poni den e ley.


Un ley importante, iniciativa cu a wordo prepara durante Gabinete di Nel Oduber 4. Sinembargo esaki no a keda cla na tempo y no a wordo trata duranta 8 aña di e Gabinete di AVP. Gabinete Wever-Croes tempran caba den gobernacion, a tuma e decision pa duna prioridad na esaki pa e ley aki pasa.


Te cu siman pasa, tawata posibel pa companianan cera cabes hunto pa asina crea monopolio y cobra consumidornan prijsnan halto pa producto y servicio. Cu e ley di reglamento di competencia aki tur posicion di Monopolio ta wordo kibra y lo bin un sistema mas husto pa proteha nos consumidornan.


E ley ta conta tambe entre otro pa banconan y companianan di utilidad. Prome Minister Wever-Croes a compromete su mes cu e prome departamento di autoridad, ‘Autoriteit Markt en Consument’, ta bay ta riba companinanan di Utilidad pa asina garantisa cu e ciudadano di pais Aruba ta haya e servicio cu e merece y na e prijs husto.


Prome Minister a expresa cu despues di un tardansa di un paar di luna na Parlamento, e ta satisfecho cu awo e ley ta na vigor. Ta obvio cu esnan cu tawata proteha cierto comerciante grandi na Aruba pa duna nan monopolio, nan wega tambe a caba. Cu e ley di reglamento di competencia ta duna realse na pone, e ser humano central y tur comerciante tin mesun posiblidadnan pa competi cu otro. Companianan grandi cu semper tawata cumpra otro compania pa nan haya posicion di monopolio, poco poco lo pasa pa pasado.


Prome Minister ta felicita Parlamento pa a pasa e ley di ‘Mededinging’ unanimamente y mustra cu e ser humano realmente ta wordo poni central.