LO INSTITUI UN TASKFORCE ‘FUTURE OF WORK’ Trahadonan lo tin papel importante den reconstruccion economico

Algun representante di trahadonan a expresa nan desapunto ora cu, segun nan, no a wordo envolvi den e plataforma nacional pa reconstrui nos economia. Premier Evelyn Wever-Croes a indica cu esaki no ta corecto. “Trahadonan lo tin un papel hopi importante den e reconstruccion economico.


Manera ta conoci Gobierno di Aruba a institui un plataforma nacional “recuperacion economico y innovacion” pa por reactiva nos economia. Premier Wever-Croes a institui un stuurgroep, cu ta duna guia na tres comision especial. Un cu ta bay traha urgentemente riba stabilisa nos situacion economico, bou dirigencia di Minister di Finansas y Economia Xiomara Maduro. E di dos comision especial “fast-track” ta bay traha riba e termino corto pa agilisa proyectonan pa start nos economia, y ta bou dirigencia di Minister di Infrastructura Marisol Lopez-Tromp. E di tres comision especial ta encarga cu innovacion y durabilidad, cu lo diseña e modelo economico nobo pa pais Aruba. E ultimo comision aki ta bou dirigencia di Premier Evelyn Wever-Croes.


“Den e comision especial di “Innovacion y durabilidad” lo tin un taskforce encarga cu “Future of work”, cu ta bay atende cu e cambionan den e forma cu nos ta traha. Den e cuadro aki, e trahado tin un papel hopi importante. Si tin un cos cu nos sa, ta cu e situacion economico y laboral despues di Covid-19, lo ta totalmente diferente cu antes. Awor nos mester di tur ayudo pa defini e forma nobo di traha, cu ta permiti Aruba keda cu un ventaha competitivo riba otro paisnan y asina nos por crece economicamente bek. E forsa principal di Aruba semper tabata su hendenan y su cordialidad, y esey lo sigui ta nos forsa den e futuro tambe”, Prome Minister Evelyn Wever-Croes a duna di conoce”.