Mega Debe y e desaster financiero causa door di Mike Eman y AVP

Parlamentario Endy Croes ta splica cu ta prohibi pa lubida e Mega Debe y e desaster financiero cu Mike Eman y AVP a causa Pais Aruba.


Desde entrada di e Coalicion actual a hereda un Aruba na werki cu debenan astronomico, un desaster financiero sin igual. Un Mega Debe inpagabel banda di un Crisis Social nunca bisto. Nos tur por corda gritonan di Mike Eman den Parlamento di Aruba cu e ta orguyoso di e debe y e debe t’ey pa nos tur bay pag’e den futuro. Nos no mag di lubida grito di e di dos palanca di AVP, esta AVP su “tweede man” Benny Sevinger kende den luna di januari 2018 tambe a grita den Parlamento “I don’t give a damn!” Esaki ta net despues di e momento cu Parlamento nobo a informa pais Aruba den un reunion publico di Parlamento di e hayazgonan desastroso cometi pa AVP tanto riba e parti financiero y ladronicianan di tereno.


Aumento di debe, 43% pa 93%
E debe di pais cual na 2009 tabata rond di 43% a wordo redobla pa Mike Eman y AVP te na 93%. Den protocol nobo di november 2018 a firma e curso cu e gobierno aki mester tuma pa asina cuminsa paga e debe di Mike Eman y AVP pa esaki por reduci na aña 2027 na 70% y continua cu e maneho aki momento cu Aruba tin surplus y no tin deficit mas pa asina por sigui paga pa e debe por alcansa 50% na 2039. Esaki ta ancra den e protocol. Pues aki 20 aña esta na 2039 algun di nos na bida ainda por mira esaki y cu nos lo yega bek na unda MEP a entrega AVP e yabi na 2009. Tristo no?


Pago interes y debenan PPP
Gobierno ta paga solamente na interes e aña aki 232 miyon florin riba prestamonan di Mike Eman. Gobierno ta paga e aña aki solamente na proyectonan PPP cual Mike y Benny a firma un total di 80.9 miyon. Esaki tambe nos lo mester paga pa e proximo 20 añanan, esta un suma di 80.9 pa aña. Pues e daño y dolor cu Mike Eman a haci na e pueblo aki ta masha grandi mes. Anto boso tin e pudor di grita ‘I don’t give a damn?’. Otro ta grita cu e ta orguyoso di e debe? Ta pa kico boso a tuma e pueblo aki?


Apesar di e crisis cu Gobierno a hereda bao di guia di Minister President Evelyn Wever Croes a sa di maniobra den temponan hopi dificil pa logra un presupuesto budget neutral den aña 2018, pues no a presta extra placa manera Mike Eman na final di aña pa klop su presupuesto. Cu Fe y perseverancia y poco poco pero sigur nos lo mira Aruba riba e bon caminda atrobe. Unico promesa cu nos mester haci un na otro ta cu nunca pero nunca mas vota pa AVP!