MEP lo crea desaroyo economico na San Nicolas,y trese progreso pa habitantenan di San Nicolas.

Partido MEP ta kere cu ta tempo pa San Nicolas haya un atencion especial. Conhuntamente cu e organisacion cu ta representa e establecimentonan nocturno na San Nicolas, Sanibars, y cu e organisacion cu ta representa comercio di San Nicolas, San Nicolas Business Association lo traha un plan con por haci San Nicolas un alternativa riba area hotelero como sitio pa “outing” y di e manera aki crea e desaroyo tan espera na San Nicolas.

Nos lo crea conhuntamente condicionnan cu lo haci inversion den e area aki beneficioso pa haci negoshi.
Lo crea espacio pa negoshinan chikito cu semper a haci San Nicolas grandi y asina crea un San Nicolas ‘Nobo’ pa compranan familiar.

Mirando cu Oranjestad, Noord y e area hotelero ta bastante satura cu construccion, lo studia e posibilidad pa San Nicolas desaroya e area pa e centro financiero di Aruba. Oficinanan di Financial Services lo por establece nan mes na San Nicolas y lo por goza di un regimen fiscal favorable.

Nos lo institui un comision special cu lo negocia cu Refineria di Aruba y Citgo tocante tereno bashi y e terenonan cu ta ser uza como “opslagterrein”, pa debolbe un parti di esaki na pais Aruba, pa desaroya esaki. Lo kita parti di e muraya di “Lago” y lo habri esaki pa publico por yega te lama, y asina crea espacio pa Centro di San Nicolas por tin su propio ‘Waterfront Area’. Di e manera ey San Nicolas lo bira mas atractivo pa comercio di “horeca”.

San Nicolas Business Association, Camara di Comercio, ATIA y demas institucionnan comercial, lo ta partnernan strategico den e maneho mas activo di Gobierno pa stimula esnan cu kier establece negoshi na Aruba,pa haci esaki na San Nicolas.
Lo desaroya Seroe Colorado pa construccion di mas vivienda; esaki ta conta pa e terenonan bashi y e casnan den mal estado.

Lo desaroya Sero Colebra (Colorado Point) como un atraccion turístico, un mirador, cu un bunita bista di San Nicolas y vecindario, y lo desaroya e area caminda antes tabata tin e hospital di Lago.
Entre Rodgers y Baby Beach lo mehora e facilidadnan deportivo y lo desaroya facilidadnan comercial di horeca y deporte acuatico. Importante ta cu habitantenan di San Nicolas lo tin preferencia pa opera e facilidadnan aki, y asina mantene e historia y cultura di San Nicolas bibo.
Lo desaroya Boca Grandi Beach como e area pa deporte di Surfing en general y Kite Surfing en particular.

Lo sostene Aruba Golf Club pa busca un partner strategico pa desaroya Golf Club den uno cu un “tinto” specifico estilo Cunucu Arubiano; lo explora e posibilidad di desaroya un proyecto di vivienda riba e tereno
Nos lo desaroya un Sporthotel moderno cu tur facilidad den e area di e parke deportivo Joe Laveist, Community Pool y sportzaal “Don Bosco”, den cooperacion estrecho cu YMCA y tambe Piscina Olimpico Roly Bislick.

​Un facilidad na unda por acomoda deportista/studiante, riba invitacion di asociacion of clubnan deportivo, pa bin haci nan training di beisbol, basketball, volleyball, natacion aki na Aruba, pa di e manera ey “cater” un grupo di turismo nobo.
Nos meta ta pa crea desaroyo economico na San Nicolas, y trece progreso pa habitantenan di San Nicolas. Nos vision ta e solucion. Hunto nos ta logra e cambio pa San Nicolas.

---