MEP TA LANSA CANDIDATO NOBO:

DAPHNE LEJUEZ

---

Na un forma innovativo partido MEP a lansa un candidato nobo diabierna 2 di juni. Ta trata aki di un candidato cu a hala masha hopi atencion, y cu ta duna un realse na e lista di partido MEP cu ya caba a lansa candidatonan hopi interesante.
 
Daphne Lejuez no ta un desconoci den nos comunidad. E ta esposa, mama di dos yiu, y pa 20 aña doño di un compania di mercadeo a traves di internet, medionan social, diseño grafico y di web, hunto cu su esposo. 
 
Daphne Lejuez tabata miembro di Camara di Comercio di 2014 te 2016, di cual a fungi como Presidente di Camara di Comercio den 2015 y 2016.
 
Daphne ta uni su mes na e fila di MEP pa contribui cu su conocemento y experiencia na un vision innovativo pa desaroyo economico di nos pais, como tambe nos medio ambiente.
 
LANSAMENTO DIFERENTE Y INNOVATIVO
E forma con partido MEP a lansa Daphne Lejuez tabata hopi diferente. A scohe pa lansa via medionan social y prensa, y organisa un 'meet the press' otro siman. Daphne Lejuez lo definitivamente atrae un otro tipo di votador pa partido MEP, cu ta e categoria di votadornan cu ainda no sa pa ken nan vota y no ta vota na forma tradicional. E lansamento di Daphne a wordo hopi specula caba den prensa y den comunidad y awor a bira un realidad.
 
"Liderazgo ta mas cu solamente un persona cu ta dirigi. Nos di MEP ta considera Liderazgo di ta un sinergia di cooperacion entre personanan cu ta basa riba respet mutuo den opinion, strategia, sciencia y politica. Un liderazgo pro-activo cu ta cultiva lidernan nobo y stimulanan pa desaroya nan potencial semper poniendo e hende central.
 
Pesey, den nomber di MEP, ta mi honor di duna un caluroso bon bini na Daphne Lejuez. Daphne ta un hende muher determina, cu vision di innovacion y prepara pa contribui na desaroyo di Aruba su sector economico.
 
MEP ta sigui expande su ekipo cu lidernan nobo cu experticio den diferente areanan. Lidernan inspira, motiva y cu amor pa nan patria, e liderazgo nobo cu Aruba merece.
 
Bon bini Daphne na e team di MEP. Paso hunto cu Daphne y e team di MEP Aruba henter ta bay p’e cambio" tabata palabranan di Evelyn Wever-Croes na e ocasion aki.
 
Pabien na Daphne Lejeuz y na MEP pa demostra liderazgo cu vision.