MEP ta recorda e di 20 aña di fayecimento di su co-fundador ing. Roland Lacle

12 di october partido MEP ta recorda cu 20 aña pasa un baluarte integro y leal na nos partido a bay laga nos, esta ing. Roland Lacle (dfm).
Roland a nace dia 17 di october 1939 y a dedica un gran parti di su bida den politica sirbiendo su pueblo y su partido den diferente funcion.

Na aña 1971, esta na momento cu Betico Croes a dicidi di forma su propio partido, Roland Lacle tabata un di e promenan cu a uni su mes cu Betico y asina a bira co-fundador di MEP, un partido cu el a stima te na su morto. Como un co-fundador, Roland a aparece riba lista for di 1971 te cu 1993 demostrando asina su lealtad incondicional na partido MEP.

Roland Lacle a lucha schouder cu schouder cu Betico Croes pa nos Status Aparte desde e inicio di e lucha te ora cu e Conferencia di Mesa Rondo a conclui exitosamente na maart 1983.

Como politico Roland tabatin un trayectorio impresionante y a ocupa practicamente tur funcion ehecutivo y legislativo. E tabata miembro di Eilandsraad di Aruba, miembro di Staten di Antiyas, diputado di Aruba, Ministro Plenipotenciario interino pa Antiyas y alavez representante di Antiyas Hulandes den Mercado Comun Europeo, Ministro di Trafico y Comunicacion di Antiyas. Pa pais Aruba e tabata miembro di Parlamento, Ministro Plenipotenciario na Hulanda y Ministro di Finanzas. Tambe Roland pa varios aña tabata Presidente di MEP y semper a sostene tambe nos lider honorario sr. Nelson Oduber.
​
Dia 12 di october 1997 Roland a fayece despues cu el a keda hopi aña sufriendo di un quebrante di salud. Como reconocemento na e gran Arubiano aki, Gabinete Oduber na 2003 a duna e caretera principal dilanti di Hospital bieu y sigui te su cas na Paradera e nomber di “Caya Ing. Roland Lacle” y p’asina tene su memoria bibo den nos comunidad. Roland su lucha, dedicacion y fieldad na nos partido lo keda semper graba den nos curason. Cu Roland  sosega na paz den Reino di Señor.

---