Mike Eman a ganja atrobe bisando cu AVP a drecha economia di Aruba locual no ta berdad ya cu e economia ta na werki.

Parlamentario mr. Juan E. Thijsen a tuma nota cu durante e debate Mike Eman Prome Ministro di Aruba y lider di AVP a gaña un biaha mas y deliberadamente ta broma cu un Aruba di cual AVP supuestamente a drecha su economia.
Esaki sigur ta un strategia cu lo costa AVP varios asciento den e siguiente eleccion segun Parlamentario mr. Juan E. Thijsen.

​ Mike Eman ta kere cu e pueblo ta bobo y ta lubida cu awendia cuidadanonan tin mas acceso na rapportnan financiero economico pero tambe e pueblo mes ta biba cada dia den carni bibo den un economia malo cu no ta duna un calidad di bida manera e pueblo lo merece.

---

Segun informacion di DAO pa november 2015 tabata tin 1936 hende muher sin trabao y 2120 hende homber sin trabao pa un total di 4056 desempleado. Ta bin acerca un grupo di 13.552 di hendenan inactivo di cual un parti lo por y mester traha pa sobrevivi si AVP keda na mando. Ta trata di hendenan di mayor edad cu no ta merece di worde obliga pa traha. Bao hubentud tambe tin e cifra alarmente cu mas di 25% ta desemplea.

Segun Cruz Cora e cantidad di hende cu ta busca cuminda cerca Cruz Cora ta hopi.  Director Michel La Haye di Cruz Cora na Noticiacla:  "Loke ta hala atencion ta cu ta tur dia tin otro hende ta bin pidi sea cuminda of paña na Cruz Cora. Tur dia nos tin hende. Tur dia. Un te dos peticion pa dia. Nan ta local, tur edad, tur dia. Nan ta hendenan di varios genero, y cu tin diferente tipo di problema".  

Segun Banco Central di Aruba e economia di Aruba ta cresciendo negativamente, na 2015 e GDP a crece cu -0,5 y na 2016 e crecemento tabata -0,2.  Gobierno ta indica (meerjarenplan) di kier yega na un crecemento di 2.5% pa aña di cual 1.5% ta turismo y 1% e refineria.

Segun Parlamentario mr. Juan E. Thijsen gobierno tin problema y tardansa pa logra esaki. Den caso cu Gobierno di AVP logra mes e 2.5% e no ta bay ta suficiente pa Aruba sali di su problemanan economico, financiero y social ya cu mester paga PPP-proyectonan y e comunidad tin hopi necesidadnan manera den ensañansa, husticia y cuido medico. 

1. Meta macro economico ta pa crea un economia fuerte y sano.

Segun Parlamentario mr. Juan E. Thijsen e economia di Aruba lo mester crece mas liher den e siguiente añanan y mester bay yega na un crecemento entre 5% pa 10% anualmente. Pa cu esaki ta importante pa introduci un maneho economico agresivo di diversificacion di nos economia. Lo mester desaroya por lo menos un 6 diferente actividad economico y percura pa por lo menos tres yega na nivel di un pilar economico. Esey kiermen cu e desaroyo economico aki lo contribui entre 10 pa 12 % di GDP.  

2. Pilarnan economico nobo

E 6 actividadnan economico cu segun Parlamentario mr. Juan E. Thijsen cu lo por ser stimula ta: Agricultura, Cria y Pesca, Industria di Cultura, Economia di Conocimento (p.e. flightsimulator), Industria Mediano y Chikito pa e mercado local pero tambe pa e mercado exterior p.e. den cuadra di LGO, Exclusieve Economische Zeezone y Internationale Rechterlijke Arbitrage etc.

Saliendo di e punto di bista cu finalmente Aruba ta bay haya tres pilar economico mas y teniendo cuenta cu e crecemento lo ta gradualmente segun Parlamentario mr. Juan E. Thijsen por yega na un crecemento economico den e añanan cu ta bin cuminsando cu 2.875% na 2018 pa yega na 2025 na 5.5% cu ta hopi miho cu e 2.5%  cu AVP tin den proyeccion pa e añanan venidero (bron meerjarenplan).  

​Parlamentario mr. Juan E. Thijsen a sali den un situacion di cautela y e cifranan por resulta miho ainda. E aña mas dificil ta esun prome pasobra apenas bo ta tuma gobernacion over y mester pone instrumentonan y maneho den funcion.

Un crecemento economico acelera pa yega na un economia fuerte y sano sigur lo trece progreso pa e trahador y comercio pero tambe pa gobierno cumpli cu su obligacionnan.

Parlamentario mr. Juan E. Thijsen ta convenci cu Aruba por sali economicamente dilanti si e gobierno incapaz di AVP bay cas y wordo reemplasa pa hendenan capacita. Parlamentario mr. Juan E. Thijsen y partido MEP ta cla pa e reto. Hunto p'e cambio sin miedo.