Mike Eman a traiciona su 7000 votadornan.Sufriendo di un patatu a tira un POESIA nacional sin ningun autoridad “No ta normal”

Parlamentario Endy Croes a amplia den conferencia di prensa extraordinario cu Mike Eman tanto diadomingo como diahuebs siman pasa tabata den contacto cu comunidad atravez di prensa. Analisando e locura di Mike Eman, esaki ta keda uno inexplicabel. Mike Eman dia 22 di september 2017 despues di eleccion unda AVP a bay atras cu mas di 10 mil voto a declara cu e lo retira como lider di AVP. Pueblo a keda masha contento como cu nan a kere cu Mike Eman lo tabata papia berdad pa promer biaha den su carera politico. Tambe Mike a splica cu AVP lo bay oposicion pasobra AVP sigur no lo traha cu POR. Mike Eman a defrauda su 7000 y pico votadornan y a scoge conscientemente cu e no lo drenta Parlamento pa defende su votadornan. Mescos Visser y Schwengle kendenan tambe a nenga nan puesto como Parlamentario cual a habri caminda pa Jennifer Reyes, Michael Lampe y Marlon Sneek drenta di carambola.


Destabilidad mental
Mike Eman ta sinta warda por ehempel ki ora SEPPA ta lanta e maestronan di school y ey e kier purba show off. Of Mike ta sinta warda META CORP lanta su empleadonan pa manifesta y ey Mike Eman kier tene na rabo di cualkier cos pa purba trece intrankilidad den un pais cu e mes a destrui. Colmo de los colmos Mike a tira un POESIA cual el a nombra como discurso nacional sin ningun clase di autoridad. Momento cu Mike Eman a ripara cu e no tabata tin acogida pasobra awor ya pueblo tin’e door en door como un manipulador cu un destabilidad mental, e kier a bolbe sali diahuebs siman pasa riba ley di LAFT. Ata Mike Eman purbando di inculca den pueblo un “crisis constitucional”. Mike Eman mes a firma e protocol di 2 mei 2015 cual a desemboca den ley di LAFT dia 27 di augustus 2015 unda pueblo a lanta pa defende autonomia cu Mike a entrega na e Hulandesnan y historia di esaki ta conoci. Awe Mike Eman tin e pudor di papia riba LAFT? Mike Eman ta e entreguista di mas grandi cu Aruba conoce banda di ta esun culpabel pa e desaster financiero.


Unda e vertrouwens regel di Mike a keda?
Un Patatu a dal Mike Eman diahuebs ultimo y Mike a cuminsa papia riba literatura y vertrouwens regel. Aki Mike Eman kier splica ki ora un gobierno mester bay cas. Locual a straña mi masha hopi segun Parlamentario Endy Croes cu Mike Eman a lubida masha liher con el a sostene por ehempel un Paul Croes. Paul kende tabata cera den KIA pa abusonan y negoshi miyonario cu permiso a keda cobra salario di minister. Mike Eman a percura pa regla esaki. Esakinan ta abusonan inperdonabel. Pueblo hamas por scoge pa coruptonan manera Mike Eman y Benny Sevinger bini bek na mando di e pais aki. Mike a pusha Marlon Sneek pa haci cambio den ley pa acomoda Paul. Unda e vertrouwens regel di Mike a keda pa cu esaki y pa cu integridad? Mike Eman a destrui Aruba tanto socialmente y financieramente. Parlamentario Croes ta indica cu ki ora un of mas politico di AVP trece algo cu no ta cuadra nan por anticipa cu e lo haya un reaccion pa pone cada un na nan lugar. Un Benny Sevinger cu a grita den Parlamento ‘I don’t give a damn’! Mike Eman cu a grita den parlamento cu e ta orguyoso di e debe y e debe t’ey pa henter pueblo bay pag’e den futuro. Pueblo, bo ta identifica bo mes cu un partido asina? Bo por identifica bo mes cu hendenan sin escrupulo di
e magnitud aki? Parlamentario Croes ta termina bisando cu nunca pero nunca mas pueblo por confia pushi cu pisca, pues nunca mas confia Aruba den man di AVP.