Minister Dangui Oduber a bishita Hyatt Place Airport

Despues di basta luna di construccion, poco poco e proyecto di Hyatt Place Airport ta yegando su etapa na unda e lo habri porta publico. Minister Dangui Oduber, mandatario encarga cu e cartera di Turismo di Aruba a haci un bishita na e dicho hotel pa asina mira con e desaroyonan ta canando.


“Satisfecho y orguyoso cu locual e producto di Hyatt ta hacienda cu e proyecto aki”, tabata e prome palabranan di e mandatario. Minister Dangui Oduber ta bisa cu claramente por nota cu e Arubiano a ser poni na pa prome luga den e proyecto aki, ya cu di 43 empleado cu lo ta laborando na e hotel, 42 ta personanan Arubiano. “E confiansa pa liderazgo di e hotel tambe a ser poni den man di un Arubiano, di cual di awo caba mi kier a desea e GM Sra. Marta Raven hopi exito cu e reto su dilanti”, Minister Dangui Oduber a expresa.


Segun Minister Dangui Oduber, e inversionistanan ta hincando un cantidad cuantioso den nos economia; un inversion di 50 miyon di dollar. Minister Dangui Oduber: “E confiansa cu tin den pais Aruba como producto ta notabel. Un inversion di e magnitud aki ta bin solamente ora cu bo por demostra di tin e capacidad y cu como gobierno bo ta hibando un maneho coherente.”


Finalmente Minister Dangui Oduber a gradici e GM, sra. Marta Raven pa e splicacion amplio di e hotel y alabes a yama danki na e inversionistanan pa a deposita nan confiansa den pais Aruba. “Nos por bisa cu Aruba en general a gana grandemente cu e proyecto aki”, Minister Dangui Oduber a expresa.


E hotel
Hyatt Place Airport Aruba ta un hotel di 116 camber, cu un variacion di standard rooms te cu cambernan completamente ekipa. E localidad ta ofrece un variedad di comodidad, manera entre otro piscina, ballroom y espacio pa reunion.


E hotel lo cuminsa opera entrante november y ya caba na entrante 16 di October e staff lo ta ricibiendo un training intensivo pa asina por brinda un servicio di calidad halto.