Minister Dangui Oduber a pone e prome piedra pa e construccion di Xavier University na Hato!

Dialuna atardi Minister di Turismo, Salubridad Publico y Deporte Sr. Dangui Oduber tabata tin e honor di pone e prome piedra pa e construccion di Xavier University School of Medicine. Tabata exactamente 1 aña pasa cu Minister Oduber a ricibi e agrado noticia cu Xavier University School of Medicine lo bay haci un inversion grandi cu ta proyecta di ta mas di 100 miyon florin total den expansion di nan scol di medicina den diferente fase. E promer fase ta un inversion di casi 40 miyon florin. Cu esaki Xavier a demostra nan confianza den minister Oduber su maneho di salubridad y tambe confianza den nos economia. E proyecto aki lo crea empleo, stimula economia y crea entrada pa gobierno. Den e forma aki Xavier University ta mustra nan compromiso cu nan tin cu Gobierno di Aruba.

E contruccion aki lo ta na Hato net patras di Aruba Bank y lo consisti di dos fase. E prome fase lo construi e parti residencial, cantina,facilidadnan deportivo y pa pasa tempo liber. E di dos fase lo construi e parti auditorium, infrastructura, academico y administrativo. Cu e contruccion aki Xavier University lo bay converti den un Campus, aki lo hospeda alumnonan y tambe profesornan kende lo contribui na Aruba su economia.
​
Xavier University tambe ta reconoce pa e organonan di acreditacion tanto como ECFMG (Education Committee for Medical Graduates) y ACCM (Accreditation Commission for Colleges of Medicine). Den cuadro di e preparacion di ley di AruBIG, Xavier University ta contribuyendo den preparacion y desaroyo di futuro medico na Aruba, esaki ta cuadra tambe cu e vision di gobierno asina e mandatario a expresa. Minister Oduber a sigui bisa cu gobierno a traha duro pa logra apunta y reconoce ECFMG como un di e organonan acreditativo pa profesionalnan den medicina por wordo reconoci pa eherce nan trabou como medico na Aruba. Durante e ceremonia Frank Croes a gradici minister Dangui Oduber pa e atencion duna na Xavier University y tambe pa tur cooperacion brinda. Danki na Sr Oduber su esfuerzo awe e scol ta wordo accredita.


Minister Dangui Oduber ta gradici e president Sr. Rabishamkar Bhooplapur, Mr. Edwin Casey (Chairman), dr. Bhat (Chancellor), Mr. Frank Croes (Trustee), Dr. Arun Dubey (Academic Officer) y tur demas miembronan di directiva di Xavier University School of Medicine pa e tremendo proyecto aki cu sigur lo aporta grandemente na economia di Aruba.