Minister Dangui Oduber: Aruba ta e promer pais den henter caribe pa tin su propio academia di futbol

Diahuebs atardi Minister di Deporte Sr. Dangui Oduber tabata presente na Compleho Deportivo Frans Figaroa pa e lansamento di e academia di nobo di AVB. Aki e mandatario a hiba algun palabra den presencia di e directiva di AVB, miembronan di CONCACAF Sr. Jason Roberts y Sr. Etienne Siliee, miembro di FIFA Sr. Marlon Glean y miembronan di prensa.

Minister Oduber a menciona cu e gobierno aki ta sostene tur proyecto cu ta yuda na eleva e nivel di deporte na Aruba. Segun e Minister gobierno ta haciendo tur esfuerso pa yuda deporte, apesar di e retonan cu tin, gobierno ta sigui yuda organisacionnan deportivo por medionan creativo. E maneho di Ministerio di Deporte tur ta entre otro ariba mantencion di infrastructura di facilidadnan deportivo.

Varios compleho deportivo ta hayando materialnan, lusnan LED y turf. Actualmente veld di United tambe ta hayando su lusnan pa asina e ekipo por practica parti anochi. E mandatario a bisa cu di su parti e lo sigui reuni cu diferente federacionnan deportivo pa asina mira unda gobierno por yuda mehora e deporte.

Sin facilidad e muchanan no por practica e deporte y e deporte no ta wordo desaroya. Ta pesey Minister a haci palabracionnan concreto cu federacion di AVB pa institui un comision cu ta consisti di stakeholders manera Ministerio di Deporte, AVB y demas organisacionnan goburnamental cu ta di importancia cu meta pa traha un plan encuanto construccion y mantencion di facilidadnan di futbol.
​
Minister Dangui Oduber a manda palabranan di felicitacion na e directiva di AVB pa cu e bunita proyecto. Tambe e mandatario a gradici FIFA y CONCACAF cu a sostene AVB den esaki. Por ultimo e mandatario a gradici ex-presidente di AVB, Sr. Rufo Kelly cu a tabata e persona cu a trece e vision pa bin cu un academia, masha pabien. Pabien AVB y pabien Aruba cu un proyecto asina importante pa desaroyo di talento di futbol pa Aruba.