Minister Dangui Oduber: Bushiri Beach ta e prome fase di e proyecto Port City

Dialuna mainta minister di Turismo, Salubridad Publico y Deporte sr. Dangui Oduber a haci bishita na Bushiri Beach. Aki e mandatario a tene un entrevista unda a elabora riba e desaroyonan di e magno proyecto Port City.

E mandatario a duna di conoce cu na momento cu su persona a drenta Gobierno, a hereda un proyecto. Gobierno no tabata di acuerdo cu e proyecto, pesei a re-diseña, haci algun cambio y esaki a tuma su tempo. Segun e mandatario actualmente cada parcela di e tereno ta wordo midi. E proyecto di Port City lo conoce dos boutique hotel chikito di entre 60 pa 80 camber, lo bay bin un convetion center, prake pa famia. Tambe lo bay bin un boardwalk y pa esaki lo haya asistencia di Port of Amsterdam. E mandatario a menciona tambe cu e ta conta y kere den inversionistanan local pa forma parti di e magno proyecto aki. Minister Dangui Oduber a trece dilanti cu pa fin di aña por spera cu e prome parcelanan por wordo entrega na e inversionistanan, esaki ta bou encargo di e director di Aruba Ports Authority.
​
Bushiri Beach

Na e momento aki por mira cu e prome fase di Bushiri Beach unda a pone santo blanco a keda realisa. Esaki ta haci cu e beach aki lo sirbi dibiaha manera localidad pa e evento magno di Aruba Beach Tennis. E segundo fase di Bushiri Beach ta esun cu lo duna un bida na e area. Esaki ta encera cu lo crea e facilidadnan, lo haci e landscaping, pone areanan di parkeo, pone cafes y hopi mas. E desaroyo di e proyecto di Bushiri Beach ta uno esencial, ya cu e ta un stap pa concretisa locual ta bay bira e Aruba Port City, segun e mandatario.
Finalmente e mandatario ta duna danki na tur persona envolvi den e proyecto aki y cu ta trahando di forma incansabel pa haci esaki realidad. “Un biaha mas ta ser demostra cu un vision coherente y un maneho serio cu Aruba na pecho, ta e formula pa resultadonan positivo pa nos pais”, Minister Dangui Oduber a bisa na final.