 Despues di hopi deliberacion y tumando tur precaucion necesario, Gobierno di Aruba a anuncia cu lo habri frontera gradualmente cuminsando dia 15 di juni 2020. Esaki a keda anuncia diaranzon anochi pa Minister Dangui Oduber.
Entrante 15 di juni 2020, Aruba lo habri su fronteranan pa pasaheronan di Boneiro y Curaçao. Pa dia 1 di juli lo cuminsa ricibi bishitante nan for di Europa, Canada y Caribe cu excepcion di Sto. Domingo y Haïti. Frontera lo habri pa merca entrante 10 di juli. Por lo pronto Aruba no lo bai habri frontera pa pasaheronan di Centro America, Sur America y tampoco Mexico. Condicionnan pa cu entrada na Aruba Pa ricibi pasaheronan for di exterior Aruba introduci algun condicionnan. E condicionnan aki ta hopi estricto y mester cumpli cu esaki nan pa por drenta Aruba. - Pre screening - Embarkation – Disembarkation card - Self Health Declaration Form - Mester bisti Face Mask - Seguro medico obligatorio pa cubri Covid-19 Insurance Entrada na aeropuerto di Aruba Na Momento cu e turista yega Aruba nan temperatura lo wordo midi por medio di un 100% thermal camera screening. Den forma di triage lo haci controle ariba sintomanan pa cu Covid-19 y lo continua pa haci e 100% PCR rapid test cual ta obligatorio. Na momento cu ta un Turista dicidi di nenga pa haci esaki na Aruba elo wordo poni den cuarentena. Si acaso ela haci esaki prome cu board na su pais elo no mester ripiti esaki na Aruba. Despues di haci e 100% PCR rapid test e turista mester keda 24ora den cuarentena na su hotel pendiente resultado. Turista cu ta test Covid Positivo Turistanan cu wordo getest y resulta cu e test ta positivo, no ta bay e hotel caminda nan a haci reservacion, sino ta bay check-in na un acomodacion cu a wordo asigna door di ATA. Tin suficiente acomodacion asigna en caso tin turista cu ta Covid-19 positivo. Sea nan a wordo identifica na aeropuerto of algun dia despues cu desaroya sintomanan. Tur esaki aeropuerto a traha ariba dje hunto cu hospital. Protocol operacional di Aeropuerto pa cu Covid-19 Minister Oduber ta consciente cu e parti operacional di nos aeropuerto lo bay wordo afecta drasticamente pa motibo di e distanciamento social cu COVID-19 a trece cune. Den e terminal parti di check-in caminda antes hopi hende por a aglomera, awor aki solamente lo permita 140 persona pa para alabes den rij pa por check-in pa nan vuelo. Na e security check point tambe tin un limitacion di 34 persona cu por ta den rij na mesun momento. E sala di migracion pa drenta pais Aruba prome cu COVID-19 tabata yena cu 500 persona alabes y awor sala aki tambe ta limita na 105 pasahero maximo na mes momento pa motibo di distanciamento social. Minister Oduber a menciona cu na aeropuerto por a tuma nota di stickernan riba vloer pa mustra e pasaheronan unda nan por para y den ki direccion nan mester bay. Den ful e terminal tin stacionnan di hand sanitizer pa tur pasahero por uza. Tur esakinan ta cambio cu AAA N.V. a haci pa por opera na un manera sigur na momento cu e frontera habri bek, asina Minister Oduber a trece dilanti. “Aruba ta cla pa ricibi turista. Nos ta sinti comfortabel cu nos a tuma tur medida di prevencion cu nos por tuma pa limita e riesgo di importacion mas hopi posibel” tabata palabranan di Minister Dangui Oduber.
0 Comments
Leave a Reply. |
Archivo
October 2020
|
RSS Feed