Minister Dangui Oduber: Conseho di minister a aproba bureau medicinale cannabis

Manera ta conoci gobierno a inclui den su presupuesto 2020 cu lo ricibi entrada di e industria di cannabis medicinal.

Esaki ta un industria creciente rond mundo y aki na Aruba tambe tin varios grupo Arubiano cu a expresa di tin hopi interes. Cannabis medicinal ta wordo usa rond mundo pa trata patientnan cu ta sufri di diferente malesanan.

Den luna di december 2019 minister Oduber ka caba a firma e decreto ministerial pa legalisa e uso di cannabis medincinal y pa por duna permiso pa importa crema, capsula y azeta cu ta di CBD cu un dosis di 0.2% di THC.
Ministerio a duna algun permiso caba di importacion conforme e condicionan cu a wordo poni y departamento di inspeccion di salud publico ta guiando e proceso aki.

Banda di esaki ta bin encaminando e proceso di cultivacion y exportacion.
Pa un gobierno por duna un permiso di cultivacion pa cannabis medicinal e mester cumpli cu e tratado di New York di verdovende middelen. E tratado aki ta bisa cu e pais en cuestion, promer cu kier duna cualkier permiso mester institui departamento di cannabis medicinal.

E ultimo lunanan ministerio di turismo, salud publico y deporte a traha hopi di serca cu departamento di recurso humano pa prepara e departamento nobo aki. A traha riba e instellingsbesluit y tambe e formatie rapport pa por presenta esaki na conseho di minister.

Recientemente minister Oduber a presenta esaki tambe na conseho di minister y esaki a keda aproba.
Cu esaki e proceso por cuminsa pa sinta y scucha tur e gruponan cu a expresa nan interes den e industria aki. Mester enfatiza hopi cla cu loke gobierno ta bai haci ta cannabis MEDICINAL, es decir e producto final lo ta cu e proposito di wordo uza, empaketa pa uzonan di salud y medico. Esaki ta pa no crea duda y ningun confusion kiko ta e proposito di gobierno.
​
E proceso aki ta tuma su tempo, e ta un tema nobo y nos kier hacie na e mihor forma posibel pa asina e por bira un pilar economico tambe.