Minister Dangui Oduber: Desaster na hospital ta refleha e falta di seriedad di e gabinete anterior

Awe mainta Horacio Oduber Hospital (HOH) a haye confronta cu un desaster di awa un biaha mas. Minister Dangui Oduber a bay haci un bishita di inspeccion pa mira e daño ocasiona y tabata hopi indigna pa mira locual ta pasando na un edificio nobo cu ta costa pueblo miyones. Un proyecto cu ainda no a ni termina y cu ya caba por wak cuanto problema el a ocasiona.

“E desaster aki ta refleha e falta di seriedad di e gabinete anterior. Bo por mira claramente cu Gabinete Mike Eman 1 y 2 a bende pueblo un 6 pa 9, na unda a papia den palabranan grandi cu e proyecto aki lo ta uno di calidad halto, cu e lo ta un joya pero a resulta di ta un proyecto mediocre”, Minister Dangui Oduber a expresa den un tono serio.

E mandatario a duna di conoce cu lo haci tur cos necesario pa pone responsabel esnan cu ta culpabel di e desaster aki. Minister Dangui Oduber: “E echo cu nos tur como pueblo mester bay paga un otro aventura di Mike Eman y su bandidonan ta un dolor inmenso pa pueblo henter. Nos a alerta for di tempo di oposicion cu esaki lo bay pasa y awe lamentablemente nos tur tin cu biba cu e consecuencianan.”
​
E mandatario ta invita sr. Mike Eman conhuntamente cu tur e personanan cu a sostene e desaster aki pa bay hospital y wak pa nan mes e desaster cu nan a laga pa pueblo. “Asumi bo responsabilidad y duna cara. Tin e decencia a lo menos pa pidi pueblo sorry y acepta bo eror”, Minister Dangui Oduber a bisa na final, dirigiendo su mes na sr. Mike Eman y partido AVP.