Minister Dangui Oduber: Fact-Team ta operacional y cla pa sirbi nos pueblo!

Diabierna mainta Minister di Salubridad Publico sr. Dangui Oduber a duna un conferencia di prensa na e edificio di Social Psychiatrische Dienst (ex edificio hulp bestuurkantoor) na Santa Cruz cu oficialmente a habri su porta. E minister a splica riba e importancia y e tarea cu e Fact-Team lo tin pa Aruba y despues a haci desvelo oficial di e edificio cual ta e edificio di unda e FactTeam lo bay opera. E Fact-Team lo cay bou encargo di Sociaal Psychiatrische Dienst (SPD) cual ta un departamento cu ta resorta bou di DVG.

Linea Central
A haci un intoduccion di un linea central di contacto pa pueblo of famia por yama pa raporta casonan di personanan cu ta sufri di salud mental manera psikiatria y/of droga adiccion. Trahando na e forma aki tambe e cliente ambulante lo ta den bista di profesionalnan pa asina por actúa liher den cualkier caso di crisis y/of emergencia. E departamento aki lo opera 24 ora pa dia y 7 dia pa siman y e number di contacto pa e casonan di crisis y/of emergencia ta TEL:5856990 y e TIPLIJN: 5224343.

Trabou di e Fact-Team
Fact-Team ta un ekipo cu ta bay sali riba caya y brinda e cuido y servicio na tur e personanan cu ta sufri di problema mental y/of adiccion. Por ehempel ora cu SPD haya yamada, e Fact-Team aki lo sali bay na e direction y haci un opname y mira e situation. E enfoke di e team aki lo ta pa yega mas serka di e adictonan ambulante pa asina duna nan e guia y ayudo den nan contexto. Si ta un situacion di tal gravedad e persona lo mester wordo interna na Respaldo. Si ta trata di un adicto e tin cu sigi un tratamento pa adiccion. Si e persona ta sufri di ambos e Fact-Team lo scohe e problema mas serio na e momento eynan pa atende cune. Esaki ta loke e trabou di e Fact-Team lo ta segun Minister Dangui Oduber.
​
Minister Dangui Oduber a splica cu tur esaki ta forma parti di e plan di maneho di integracion di psikiatria y adición riba e tereno di Salud Mental y ta parti tambe di e Crisis Plan Social. Di e manera aki e Gobierno un biaha mas ta demostra cu e tin e interes di e ser humano central. E mandatario a garadici Mental Health Caribbean pa nan aporte den e proyecto y tambe tur e trahadornan di e Fact Team cu ya tin lunas ta preparando nan mes pa eherce nan trabou. Finalmente Minister a gracici colega Minister di Asuntonan Social Sr. Glenbert Croes pa kere, duna sosten y financia e proyecto asina e mandatario a trece dilanti.