Minister Dangui Oduber: Feliz dia Internacional di enfermeria

Dia 12 di mei ta dia internacional di enfermeria. E dia aki ta cuadra cu e fecha di aniversario di e fundado di enfermeria moderno, Florence Nightingale.

Minister di Salubridad Publico sr. Dangui Oduber ta expresa su aprecio pa tur cu ta traha den enfermeria. Nan labor ta bisto entre otro den Hospital, Imsan, centronan di cuido di nos grandinan, ambulance, dokternan di cas, cu specialistanan, Wit Gele Kruis y laboratorionan. Awe ta un dia pa reflexiona y bisa danki na tur e enfermero/a nan trahando na Aruba y rond di mundo, specialmente den e temponan dificil aki cu COVID-19, asina Minister Oduber a expresa.

Minister Oduber ta recorda cu prome cu e crisis di COVID-19, Aruba tabata tin solamente 6 unidad di cuido intensivo, riba propio forsa a aumenta esaki na 21 unidad. Recientemente a aumenta e cantidad di unidadnan di cuido intensivo na 33 unidad cu ayudo di Hulanda. E gobierno aki lo sigui zorg pa tin suficiente profesionalnan disponibel den e function importante aki. Lo sigui bin cu e estudionan di enfermeria riba nivel di HBO aki na Aruba mes y di e manera aki sigui inverti den nos profesionalnan. Minister Oduber su vision ta pa sigui mehora e calidad di cuido aki na Aruba aun mas.

Minister Oduber ta manda palabranan di pabien na tur nos enfermero/a nan y yama nan danki pa dedica nan bida na yuda otronan y tambe danki pa comparti nan compasion, expertisio y confiansa. Nos enfermero/a nan ta e weso di lomba den Salubridad Publico.

Un gradicimiento di curason pa tur boso excelente trabounan cu boso ta haci pa nos comunidad. Un trabou noble cu boso ta haci cu curason grandi.

Como Minister di Salubridad Publico nos tin gran aprecio pa boso profesion.
​
Danki