Minister Dangui Oduber: Gobierno di Aruba lo brinda servicio di transporte pa pashentnan cu ta dialisa cu no tin of no por paga transporte mientras cu “comision zorgtoeslag” lo yega na un maneho difinitivo pa alivia peso financiero.

Gobierno di Aruba a institui un comision cu ta yama “Commissie Zorgtoeslag”. Cu ta consisti di AZV, SVB, Minister di Turismo, Salud Publico y Deporte, DIMP, DAS y DWJZ. E comision aki su tarea ta bai pa duna conseho na Ministerio di Turismo, Salud Publico y Deporte con pa introduci “zorgtoeslag” pa pashentnan den exterior cu ta bai ricibi 50% menos di e dag geld vergoeding manera a wordo anuncia anteriormente. Tambe lo conseha con pa introduci e zorgtoeslag pa begeleiders cu e vergoeding a wordo elimina completo. Pa vang op e transporte pa personanan cu no ta wordo cubri mas pa AZV y eigen bijdrage.


E intencion ta pa e comision aki bin cu un conseho dentro di dos siman pa asina por dicidi kende ta bin den remarke pa e posibel “zorgtoeslag” aki.


Importante ta pa nos vang op e personanan mas vulnerabel den comunidad cu ta wordo afecta pa cu e decisionnan cu hulanda e exigi Gobierno di Aruba tuma pa reduci e gastonan di AZV. Apesar cu nos tin instruccionnan pa sigui di Hulanda, toch Gobierno di Aruba y AZV a purba na tur momento na garantiza e continuidad di cuido.


Mester remarke si cu hopi di e continuidadnan aki no ta regla den ley. Por ehempel na momento cu un pashent y begeleider bai den exterior AZV tabata dunanan un vergoeding, cu no ta regla den ley pero a bira un custumber y esaki ta conta mescos pa e transporte.


Minister Dangui Oduber kier pa pone enfasis cu transporte pa e pashentnan cu ta dialisa ta sigui wordo cubri pa AZV si nan ta “bedliggende pashent”, pashent den rolstoel y/of ta pashent cu no por cana. Pa tur otro pashent ta wordo spera cu sea un familiar of nan mes por paga pa un transporte.


Na mesun momento gobierno di Aruba a bin cu un opvang cu ya caba ta andando den bon coordinacion cu ImSan y Hospital cu ta bai percura pa na tur momento tin transporte pa sea ta un pashent cu ta biba di un pensioen di SVb, cu ta biba di bijstand cu no tin ningun familiar cu por transportanan y cu tampoco lo por paga pa un servicio di transporte. Esaki pa garantisa e continuidad di dialyse pa tur pashentnan.


E servicio di transporte aki pa esnan cu no por carga e peso propio, Gobierno di Aruba lo vang op mientras cu e comision “zorgtoeslag” lo bin cu un conseho difinitivo con pa atende cu e transporte despues di e tempo aki. Gobierno di Aruba lo ta pendiente di e comision “zorgtoeslag” pa e categoria di esnan cu lo bin den remarke cu e sumanan corespondiente cu lo bin na remarke pe pa cada categoria.


Cu esaki pashentnan por sinti nan mes mas trankilo cu e servicio di transporte lo wordo brinda na nan si no por carga e peso financieramente of por medio di ayudo familiar. Ta wordo spera cu famianan lo coopera pa yuda transporta pashentnan cu tin e forma pa wordo transporta.