Minister Dangui Oduber: Gobierno ta tumando tur paso pa preveni casonan di coronavirus cu lo por drenta Aruba

Diadomingo atatardi gobierno di Aruba a yama un conferencia di prensa encuanto un update y proceduranan encuanto medidanan di precaushon pa cu esnan cu a bay celebra aña di chines y ta regresando Aruba.

Na promer lugar gobierno ta enfatisa cu no tin niun caso di coronavirus aki na Aruba. Desde awe un procedura extra cu Aruba riba conseho di DVG y expertonan riba tereno di rampen a dicidi di hasi un control preventivo promer cu de-boarding tuma lugar.

Den caso cu pasahero(nan) mustra sintoma hospital tin cambernan di isolacion disponibel y tin lugarnan di quarantain asigna pa esnan cu mester bay den quarantain pa evita contagio. Esnan yegando Aruba no ta bini di lugarnan na China cu ta conoci cu casonan di contagio. Tambe ta importante pa informa pueblo cu e crusero cu ta yegando Aruba no tin coronavirus pero H1N1 conoci como influenza.

Gobierno ta tumando tur paso conhuntamente cu profesionalnan y expertonan y ta actua riba consehonan di INternational Health Regulations pa asina mitiga y preveni casonan cu lo por drenta Aruba. Algo importante pa remarka ta cu Aruba no tin vuelo directo di China. Esaki kiermen cu promer un pasahero enbarca na Aruba e pasahero lo tin cu pasa diferente gateway na cual controlnan lo tuma lugar.

​Tin control na China y na hulanda y merca pa esnan cu ta bini di mainland China. Como extra precaushon Aruba lo eherce controlnan preventivo na momento cu tin conoci cu tin pasaheronan cu ta bini di mainland China. Gobierno ta reevaluando pasonan di control pa preveni y mitiga risiconan pa cu coronavirus. Tur medidanan ta na nan lugar den caso cu un caso lo presenta.