 Minister di Turismo sr. Dangui Oduber na aña 2018 a introduci un masterplan pa San Nicolas na pueblo di Aruba. Un plan cu a enfoca na desaroya e turismo di San Nicolas drechando e aspecto infrastructural, pero tambe activando y modernisa e oficina di turismo na San Nicolas. Despues di algun luna di destaho publico, awor por anuncia cu na luna di augustus lo tin groundbreaking di e proyecto di Baby Beach segun e mandatario. Minister Oduber a splica cu e proyecto di Baby Beach ta un bunita proyecto pa San Nicolas. Lo bay drecha e canchanan deportivo y percura pa nan haya mantencion. Ta bay crea espacio pa parkeer, cual no tin na e momento aki. Ful e area lo haya iluminacion y e landscape tambe lo haya un mehoracion, e proyecto aki lo bay ta den dos fase. Pronto e piernan y e infrastructura na Rodgers Beach tambe lo wordo drecha, tur cos ta bay den fase segun e mandatario. Tur esaki ta bay trece mas actividad pa San Nicolas pa asina percura cu e turista ta bin San Nicolas pa crea mas actividadnan economico. E proyecto di Baby Beach ta e proximo proyecto pa wordo inicia bou di e plan integral cu Gobierno tin pa San Nicolas. Minister Oduber a menciona cu e ta lamenta cu tin NGO’s cu tin agenda politico ta haci campaña negativo pa boycot e proyectonan cu ta beneficia San Nicolas. E mandatario a trece dilanti cu a logra gana e confiansa di e comerciantenan y e pueblo di San Nicolas, nan ta kere den e plan integral di Gobierno. E Minister a termina bisando cu “Keda sin haci nada pa San Nicolas NO ta un opcion mas. San Nicolas tin tur e potencial pa haya su fair share den e desaroyo di nos pais”.
0 Comments
Leave a Reply. |
Archivo
October 2020
|
RSS Feed