Minister Dangui Oduber: Prome edicion di Aruba Health Fair tabata un exito!

Minister di Salubridad Publico sr. Dangui Oduber tabata presente na e Feria di Salud cu a tuma lugar diasabra atardi riba e tereno di AZV. Aki e mandatario a duna su discurso, unda e la gradici AZV pa bin cu e bunita iniciativa pa organisa e “Aruba Health Fair” y tambe tur e bendedornan cu a participa na e evento pa haci esaki un exito.

​
E meta di e AHF tabata pa informa y conscientisa e comunidad di Aruba tocante cuido di salud. Hunto cu tur partnernan riba tereno di salubridad, pa duna un bon bista pa e siguiente añanan. Conscientisacion tocante movecion, come saludabel, habitonan saludabel, den corto, tur kico un bida saludabel ta encera. Tambe den e AHF a informa comunidad tocante su derecho y obligacionnan incluyendo e ehecucion di e ley AZV. Un atardi hopi informativo den un esfera familiar, unda a bende cumindanan, producto nan saludabel y comunidad por a haci un chekeo medico, segun e Mandatario.


E mandatario a splica cu su vision ta pa promove un miho cuido medico pero tambe un miho calidad di bida pa e población di Aruba. Pa añanan nos systema di cuido medico ta inverti den medicamento y e costo di esaki ta keda aumenta mas y mas. Y esaki ta un otro motibo pakiko e gobierno aki ta compromete su mes na duna atencion real na e parti preventivo. Aruba Health Fare a trece e informacion y educa e comunidad na un forma interactivo, esaki sigur ta cuadra cu e maneho di gobierno segun e mandatario.

​
Finalmente Minister Dangui Oduber kier a felicita e director di AZV sr. Ruben Goedhoop y ful e team di AZV cu e evento grandi di Aruba Health Fair. Tambe e Minister a gradici tur stakeholders cu a atende na e feria. Un evento hopi exitoso cu sigur a contribui na conscientisa pueblo pa hiba un bida mas saludabel.