Minister Dangui Oduber riba control di 'Task Force Bedrijven’: Taskforce bedrijven den pleno ehecucion, percurando pa nos salud

Pais Aruba a institui un asina yama 'Taskforce Bedrijven' cu ta forma parti cardinal den tur esfuerso pa combati e pandemia COVID-19. E 'Taskforce Bedrijven' tin como meta principal percura pa tur compania y establicimento na Aruba mantene nan mes na regla manera stipula den decreto ministerial relaciona cu ordenansa di calamidad. Asina ta percura cu cada persona cu bishita e localidadnan aki por confia cu localidad ta cumpli cu tur regla di higiena y distanciamento social. E taskforce ta wordo lidera door di 'Dienst Warenkeuring en Hygiëne' (DWH) di DVG y ta wordo sosteni door departamento 'Gele Koorts en Muskieten Bestrijding' (GKMB) y 'Korsp Polite Aruba' (KPA). Asina den un ekipo multidiscplinario ta eherce e control nan necesario pa percura pa e siguridad y salud di cada ciudadano.


Trabou di control:
Por bisa cu e mayoria localidad ta cumpliendo cu e reglanan manera stipula den e decreto ministerial di calamidad y ta cooperando durante e controlnan cu ta wordo haci. Te cu e periodo di 28 di augustus 2020, a controla 954 localidad. E tipo di localidadnan tabata varia di e.o. tienda di paña, fitness center, restaurant y/of koffieshop y supermercado. Por informa cu di e tolalidad di 954 lokalidad controla, 555 tabata cumpli cu e reglanan, 195 tabata tin punto di mehoracion, 113 no tabata cumpli y 87 no tabata habri. Controlnan a wordo haci den diferente area manera San Nicolas, Oranjestad, Noord, Paradera, Santa Cruz y Dakota. Asina por informa cu minister Dangui Oduber ta satisfecho di con a trabounan ta bayendo y ta informa cu ‘Taskforce Bedrijven' lo keda eherce e controlnan necesario pa asina percura pa e salud y siguridad di nos pais.