Minister Dangui Oduber ta duna informacion di e vacuna

Ministerio di Salubridad Publico ya pa varios siman caba ta hacienda preparacionnan necesario pa Aruba por ricibi e prome lote di vacunanan. For di aña pasa den reunionnan di “vier landen overleg” hunto cu Minister di Reino Sr. Paul Blokhuis a estableci tur e procesonan cu lo mester en camina prome cu Aruba por ricibi e vacuna. Minister Oduber a trece dilanti cu ya caba tin tres vacuna cu ta riba mercado, esta esun di Pfizer, Moderna y Astra Zeneca's.
Minister Oduber a sigui bisa cu cada un di e vacunanan aki tin nan propio temperatura stipula cu nan mester wordo warda aden. Pa es motibo hulanda a pone como rekisito tambe un freezer special cu mester wordo uza pa por warda esakinan. Aruba no tabata dispone di e freezer specialnan aki y pesey mes a haci un peticion na Hulanda pa haya esakinan. Minister Oduber a laga sa cu tur cos ta canando segun e plan, dia 13 di januari e prome freezernan a yega Aruba y dia 15 di januari. 

Tin e vacuna di:
•​Pfizer – cu mester wordo warda den un temperatura di -80 graden Celsius
•​Moderna – cu mester wordo warda den un temperatura di -20 graden Celsius
•​Astra Zeneca – cu por wordo warda den temperatura regular di cooler  
Y lo bin mas vacuna tambe riba mercado tambe durante e aña aki. Mester bisa si cu den e prome lote lo ricibi solamente e vacuna di Pfizer, segun e mandatario.

E mandatario a sigui menciona cu si tur cos sigui segun e plan dia 25-26 januari proximo representantenan di “Rijksinstituut voor Volksgezondheid en Milieu” (RIVM) lo ta na Aruba pa haci un control riba tur e preparacionnan cu Aruba a haci y ta haciendo pa ricibi e vacuna. Minister Oduber a trece dilanti cu e promer vacunanan lo por wordo entrega memey di februari 2021 na Aruba.
Minister Dangui Oduber ta convenci cu Aruba lo haya e lus berde di RIVM dia 25-26 di januari. Aruba a traha duro pa por cumpli cu tur e rekisitonan estableci pa Hulanda. Desde december ta trahando duro y pesey mes e mandatario ta sinti cu Aruba ta cla pa ricibi e lus berde pa por haya e vacuna.

​Finalmente e Mandatario kier a haci un apelacion na pueblo di Aruba pa vacuna nan mes, proteha nan mes pa asina Aruba por progresa. Ban yuda den e recuperacion di nos turismo y recuperacion di nos economia pa asina Aruba por bolbe bek na normalidad, asina Minister Oduber a expresa.