MINISTER DANGUI ODUBER TA ELABORA RIBA E LANDSPAKKET DI CUIDO

Manera ta conoci Gobierno di Aruba a firma e Landspakket cu Hulanda. Den e Landspakket aki diferente puntonan di accion a ser accorda entre Aruba y Hulanda. Pa e sector di cuido tambe diferente puntonan di accion a ser acorda.
Den cuadro di transparencia ta mustra pueblo di Aruba riba locual ta trata e acuerdonan y accionnan cu Ministerio di Salubridad Publico mester cumpli cune.

E parti di cuido medico di e Landspakket ta wordo parti den 3 componente:
1) Accionnan pa por maneha y contene e virus Covid-19:
Tur e instrumentonan necesario mester ta na nan lugar pa preveni y contene plamamento di COVID-19 na Aruba.  Esakinan ta ensera: mantene e capasidad di e unidad di cuido intensivo (ICU)(inclui e personal adicional di AMI) na Hospitaal, e introduccion di e vigilancia di sintoma (investigacion di e cero prevalencia),  mantene  e unidad di contact tracing uno intensivo, fortalese e capacida di Salubridad Publico, intensifica e control y  amplia capacidad di test na aeropuerto. Desaroya controlnan mas estricto na frontera. Mantene campañanan di conscientisacion, centronan di informacion y contacto (call centers) etc.
Tambe palabracionnan a ser hasi den cuadro di programa di vacunamento manera preparacionan di material y machinnan pa warda e vacunanan na e manera stipula conforme e protocolnan di calidad, sosten den implementacion di e programma di vacunacion. Tambe Aruba por conta ariba asistencia tecnico di Hulanda si esaki ta necesario. Tur esaki a wordo controla, supervisa pa RIVM.

2) E Segundo punto tin como obhetivo pa paisnan den Reino traha mas estrecho cu otro riba tereno di cuido, specialmente intensifica e cooperacion entre hospitalnan den reino. E meta di e cooperacion aki ta pa haci e cuido medico den e islanan mas sostenibel y pa aumenta e eficiencia y e calidad.
Mientrastanto hospitalnan ya caba ta den un etapa mas avansa pa cu e cooperacion aki. Den cuadro di esaki hospitalnan den Reino ya a firma un acuerdo pa realisa e cooperacion aki.

​3) Como ultimo punto di accion ta referi na un investigacion andando cual tin como meta pa defini e concepto di “cuido basico” na Aruba. E meta di e investigacion aki ta pa defini e cuido necesario cu e pueblo di Aruba mester por conta ariba dje den relacion cu e cuadro clinico di nos hendenan. E resultado di e investigacion aki lo forma e base ariba cual e cooperation di cuido den reino ,manera stipula den punto dos, lo wordo incorpora y reparti  pa yega na eficiencia y efectividad riba e tereno di cuido medico den reino. E investigacion ta andando dese januari 2021 y ta ser ehecuta door di  professor J. Hubben (un experto riba terreno di salubridad y cu conocimento extenso di e systema di Salud na Aruba). Mientrastanto Gobierno a institui un comision nacional di cuido. E meta di comision nacional di cuido aki ta pa conhuntamente bini cu proposicionnan pa  implementacion di instrumentonan den e systema di cuido medico na Aruba cumpliendo cu palabracionnan cu hulanda y pa discuti reformanan den cuido medico na un manera acceptabel y responsabel manteniendo e calidad di cuido na Aruba y asina  yega na un seguro di medico (AZV) sostenibel.