Minister Dangui Oduber:“Salud di e ser humano ta e topico central di e ley di Serlimar”

E siman aki un di e cosnan mas comenta den comunidad ta e cambio cu parlamento ta tratando riba e ley di Serlimar. Pa Minister Dangui Oduber un cos ta sigur, e salud di e ser humano ta e topico central y esun di mas importante den tur discusion cu ta ser hiba.

“E no ta un secreto cu pa hopi aña como pueblo nos ta sinta cu e problematica di e dump na Parkietenbos. Esnan mas afecta den e caso aki ta e ciudadanonan di Simeon Antonio y cercania, kende dia aden dia afo mester soporta molester di holo, musca y sin laga afo problemanan di salud cu esaki a trece cu ne. Pa prome biaha den historia, por mira un gabinete cu a tuma seriedad pa atende cu asunto aki, di forma responsabel y cu determinacion”, Minister Dangui Oduber a expresa. Segun e mandatario, e topico no ta uno facil pa atende mirando cu tin hopi aspecto cu ta hunga rol y ademas cu ta tratando na acomoda e necesidad di tur esnan directamente of indirectamente afecta. Tur persona, gremio, instancia envolvi den e proceso di e ley aki tin un cos cla: e efecto mas importante ta e mehoracion di salud cu e remediacion di Parkietenbos ta trece cu ne, segun e mandatario.

Minister Dangui Oduber: “E echo ta cu awor tin un discusion habri, un democracia real. E no ta un discusion solamente financiero, sino uno cu un base mas amplio, na unda bo kier garantisa cu e personanan mas directamente afecta tin e mesun e derecho di tin un calidad di bida saludabel manera tur otro ciudadano tin riba e pais aki.” E rapport di PAHO a conclui cu parkietenbos mester wordo sera mas pronto posibel. Nos a pone den nos programma di gobernacion cu nos lo percura pa haci esaki tambe pa cumpli cu nos programma.
​
Finalmente Minister Dangui Oduber a expresa cu e ta eherce su deber como mandatario encarga cu salud di forma serio y ta sostene tur iniciativa y/of proyecto cu ta garantisa un mehoracion den e calidad di salud di tur persona, ya sea ta trata un parti so di nos isla of e comunidad completo. “Un Aruba saludabel ta e esencia integral di e maneho cu ta ser hiba na e momento aki pa e cartera di salubridad”, e minister a expresa.