Minister di Finansa, Asuntonan Economico y Cultura Ruiz-Maduro:Tur Aduanero lo ricibi un total di Afl. 175,= na periodiek y un liña corto di carera

Durante conferencia di prensa di Gobierno, Minister Ruiz-Maduro a brinda informacion tocante e accion di Aduana y e caso sumario cu Gobierno a entama contra di e Aduaneronan cu e welga cu nan a anuncia den un termino hopi corto.


Accion di SADA y caso sumario di Gobierno
E mandatario a informa cu SADA a informa Gobierno di un rato pa otro cu nan ta bay den welga door cu Gobierno no ta cumpli cu e convenio firma dia 1 di juli 2017 door di ex minister di Finansa, sr. Bermudez.
Como cu e accion aki ta trece consecuencia pa economia di Pais Aruba, Gobierno a entama un caso sumario contra SADA. Na esaki a uni ATIA y Camara di Comercio pa hunto vocifera nan preocupacion di parti di e comerciantenan.


Decision di hues
Hues a manda e Aduaneronan reanuda trabou entrante 6or di mainta diahuebs 12 di september y a duna un ‘cooling off period’ di 30 dia durante cual SADA tampoco tin mag di bini cu ningun otro tipo di manifestacion.


Gobierno no por crea presedencia
E dignatario a informa cu Gobierno a ricibi conseho negativo di tanto e Organo Consultivo (Raad van Advies), Departamento di Recurso Humano, Departamento Legislativo y Departamento di Finansa riba e convenio di Aduana. Si Gobierno cumpli cu e convenio cabalmente, esaki lo crea un presedencia na unda cu otro empleado publico por pidi e mesun beneficionan y a base di principio di bon gobernacion, Gobierno lo mester duna nan tambe e beneficionan aki. E presedencia aki lo por costa entre 50 pa 60 miyon na gasto extra di personal.
Mirando e situacion financiero precario di Pais Aruba y teniendo na cuenta cu tin un protocol sera cu Hulanda den cual mester baha gastonan di personal, Gobierno no por sera wowo pa e consehonan negativo y djies cumpli cu e convenio di Aduana integralmente.


Locual Gobierno por cumpli cune
Gobierno a bay di acuerdo pa duna tur Aduanero un subida di un total di Afl. 175,= (Afl. 150 + Afl. 25) na periodiek y tambe a haci e liña pa haci carera mas corto. Pues Gobierno a cumpli cu deseo di e Aduaneronan, pero no por cumpli cu tur e puntonan di e convenio cabalmente.


Siguiente paso
Gobierno di su parti lo bay brinda informacion directamente na e Cuerpo di Aduana. Departamento di Recurso Humano lo haci un presentacion na e Cuerpo di Aduana en general di e beneficionan cu Gobierno a duna e Aduaneronan a base di e convenio. Di e manera aki e Aduaneronan por wordo bon informa di e partinan di e convenio cu Gobierno a cumpli cune, pa asina e Aduaneronan por ripara cu nan no a sali perhudica.