MINISTER DI FINANSA: PRESUPUESTO 2020 DI PAIS ARUBA CU UN CONTENIDO MAS TRANSPARENTE

Recientemente Minister Xiomara Maduro acompaña pa e Secretaria di Conseho di Minister sra. Grace Koolman a haci entrega di e Presupuesto di Pais Aruba 2020 na un manera inovativo riba un USB stick di un bara di oro, na Presidente di Parlamento sr. Juan Thijsen den presencia di Griffier di Parlamento sr. Herman Hek.


Presupuesto 2020 a wordo modernisa
Durante di e entrega di e Presupuesto, Minister Maduro a informa cu e contenido di Presupuesto 2020 a conoce cambionan den e manera cu ta presenta e informacion pa asina e Parlamentarionan y otro usuarionan por haya un contenido mas completo y mas transparente.
Awor e contenido ta brinda un miho bista entre locual ta ser presupuesta den cada un Ministerio en conexion cu e maneho di cada un Ministerio. Ademas e inclui mas informacion den cada un Ministerio y ta inicia cu e agenda di maneho, sigui pa e prioridadnan di maneho, y tambe e cambionan di maneho den aña 2020. Hopi importante ta kico e cambio di maneho tin como resultado financiero.
Den e Presupuesto tambe a delinea cu grafico un bista di e debe y e likides di Pais Aruba. Tambe a duna un bista amplio di e gastonan di personal di Gobierno y e subsidionan cu Gobierno ta otorga.
Gabinete Wever-Croes a compromote pa implementa e 17 metanan di desaroyo sostenibel di Nacionnan Uni y a incorpora esakinan den e Presupuesto 2020. Pa prome biaha a inclui na cada un Ministerio, cual di e 17 metanan sostenibel di Nacionan Uni, e maneho di e Ministerio lo por cumpli cune. Na momento cu presenta e Cuentanan Anual, Controlaria General por controla cual ta e metanan di e desaroyo sostenibel Gobierno a cumpli cune den su maneho.


Gradicimento
Minister di Finansa a gradici su coleganan Minister y nan staf, su conseheronan financiero, funcionarionan di Departamento di Finansa y di Departamento di Legislacion cu a traha inalcansablemente pa por a entrega e Presupuesto. Tambe e dignatario a gradici staf di Conseho di Minister cu a yuda den e proceso di entrega di Presupuesto.


Proceso
Awor cu e Presupuesto a keda entrega na Parlamento, e miembronan di Parlamento lo studia e Presupuesto. E miembronan di e organo legislativo di nos Pais lo trata e Presupuesto den Comision Central y lo haci pregunta na Gobierno. Depues di ricibi contesta lo bay continua cu e Reunion Publico pa e debate riba Presupuesto 2020.