Minister Glenbert Croes a entrega e raportahe di SCP na Sr. Raymond Gradus di CAFT

Tempo cu Gabinete Wever-Croes a keda instala tin dos situacion cu nan a hereda. Un ta e maneho financiero descabeya y iresponsabel cu a culmina den supervision financiero y e otro tabata un crisis social cu a explota den cara di tur Arubiano cu a sacudi e fundeshi di nos existencia.


E crisis social no a cuminsa 24 di November 2017, cu ta dia cu Rishandroh a fayece. NO! E crisis social a wordo bari bou tapijt, scondi pa pueblo, pintando un Aruba ‘floreciente’ riba un canvas gris di tur su berdadnan scondi.
Pues despues di e suceso lamentabel cu ainda ta den memoria di tur hende, Minister Glenbert Croes a yama e sector hunto y instrui nan pa bin cu un plan di accion pa inventarisa e problema y con pa atende cu nos problema social. Di e instruccion aki a nace e Crisisplan Social cu awe tin 31 proyecto den pleno ehecucion.


En vista cu pa atende cu problemanan social, e tin su exigencia financiero, e mandatario respetando e organo di supervision, a reuni cu Sr. Raymond Gradus cu ta presidi CAFT hunto cu su consehero Sr. Pieter Jan van Roon.
Durante e reunion aki un reportahe amplio a ser presenta y entrega oficialmente na CAFT.


Minister ta gradici Sr. R. Gradus pa a brinda e delegacion di Aruba e oportunidad pa por a encontra cu su persona.