Minister Glenbert Croes a reuni cu representantenan di Ministerio di Defensa

Apesar cu e mandatario su mision na Hulanda ta pa presenta su raportahe riba e crisisplan social, den su opinion oportunidadnan laboral ta bay man den man cu desaroyo social.

Minister Glenbert Croes a reuni cu Seargant-major Elvis Manuela, Sra. Myrna van der Kaap y Sr. Stanley Nooitmeer di Ministerio di Defensa.

E titular di Asunto Social y Labor a expresa su apoyo total na Ministerio di Defensa di Hulanda kende kier traha cu e.o. Aruba riba reclutacion di hobennan di entre 16 aña y 27 aña cu ta interesa di sigui un carera den Defensa di Reino sea ta den Marina, Forsa Aereo, Ehercito of Marechaussee.

E ta un gran oportunidad por ehempel pa esunnan cu no a logra termina un scol of un estudio pero cu sigur kier inverti den su futuro. Of pa esun cu kier un trabou cu ta ofrece bo tremendo prospecto y condicionnan laboral. Hasta cu si bo ta gradua profesionalmente pero ainda tin interes pa sigui desaroya bo mes.Pa tur hende cu tin interes, Defensa di Reino ta ofrece bo un tremendo oportunidad pa inverti den bo futuro y sigui desaroya bo mes.

Fin di October Ministerio di Asunto Social y Labor lo presenta su ‘jobfair’ pa tur hoben cu kier un carera den Defensa, cu lo kier un di dos oportunidad den bida of cu simplemente kier sigui desaroya su mes profesionalmente. Keda pendiente pa mas informacionnan cu lo sigui despues.

“Nos ta bay traha di cerca cu Ministerio di Defensa di Hulanda den e proyecto piloto: Werven in het West, pa duna nos hobennan di Aruba e oportunidad na Hulanda cu posibel careranan den Defensa di Reino”, e mandatario a expresa.