Minister Maduro a presenta e Segundo Cambio di Presupuesto 2020 na Parlamento

Minister Xiomara Maduro a presenta e Segundo Cambio di Presupuesto 2020 na Parlamento. E mandatario ta informa cu cada tres luna e ta bin ta informa Parlamento di e Cambionan riba Presupuesto pa asina por duna nan un bista di e realidad financiero di Pais Aruba. Pa informa Parlamento na un manera mas efectivo riba e cambionan proponi den e Segundo Cambio di Presupuesto 2020 e dignatario a manda tambe adelanta pa Parlamento e ‘Najaarsnota’ den cual ta elabora riba e cambionan proponi.

Economia lo cay cu 28.5% enbes di 36%
E mandatario ta sigui bisa cu na augustus ultimo Departamento di Asuntonan Economico (DEZHI) a haci un pronostico nobo y a indica cu economia di Aruba lo cay cu 28.5% pa fin di aña 2020. Esaki ta hopi menos cu 36% cu a ser calcula na augustus 2020 na momento cu a presenta e Cambio di Presupuesto y compara cu e 44% cu a ser pronostica na luna di maart 2020. Pa e motibo aki mester a adapta e cifranan den e Presupuesto 2020.


Cambionan den Presupuesto 2020
Minister Maduro ta subraya cu e cambionan mas grandi den Presupuesto 2020 ta pa inclui e medidanan di solidaridad cu e empleadonan di Gobierno, Ministernan y Miembronan di Parlamento (72 miyon florin) y tambe personal di e Empresanan Estatal (4.3 miyon florin) di Gobierno a tuma. E medidanan di solidaridad aki ta pa brinda yudansa na e personanan cu a perde trabou y entrada door di COVID-19 pa por a ricibi yudansa den FASE y tambe pa brinda e sosten financiero di 4.000 florin pa kwartaal na companianan chikito y mediano. Banda di esaki a haci algun cambio tecnico y di maneho pa por ehempel aloca e 6.5 miyon florin pa por yuda Serlimar. Ademas door cu no lo tin un surplus mas pa aña 2020 tin gastonan extra di fiansa y interes (20.3 miyon florin) cu lo mester wordo cubri.


Gradicimento
E dignatario ta informa cu e Presupuesto Supletorio 2020 a wordo aproba den Parlamento. Minister Maduro ta gradici tur expertonan financiero cu a traha riba e cambionan necesario pa asina nos Pais por conta meymey den un pandemia cu un Presupuesto cu ta refleha realidad di e situacion financiero y economico di nos Pais. E mandatario ta gradici tambe tur colega Minister y miembronan di Parlamento pa nan cooperacion.