MINISTER MADURO: GOBIERNO TA TRAHANDO PA HACI E DEBE PAGABEL PA PUEBLO

Durante e conferencia semanal di Gobierno, Minister di Finansa a duna un bista di e situacion financiero di Pais Aruba pa asina tur hende por comprende e situacion financiero di nos Pais Aruba.


Creando espacio financiero pa inversion den e hende
E mandatario a subraya cu ta conoci durante e gobernacion pasa Aruba su debe a wordo redobla y hunto cu esaki e proyectonan PPP, manera Green Corridor, Hospital y Watty Vos Boulevard, ta pone un peso grandi riba e finansa di Pais Aruba y e cartera di cada cuidadano di nos Pais. E debe y e obligacionnan financiero di e proyectonan PPP no ta disparce cu solamente un cambio di Minister di Finansa y Gobierno of Parlamento. E debe y gasto di PPP tey pa nos tur paga cu orguyo manera e ex Premier di Aruba a bisa den Parlamento di Aruba. Locual Gabinete Wever-Croes por medio di Minister di Finansa ta trahando riba dje ta pa haci e debe y e obligacionnan financiero aki pagabel pa Pueblo sin perde foi bista e inversionnan necesario den e hende.


Stabilisa e situacion
Ta bon pa recorda cu na momento cu e Gabinete nobo a asumi e responsabilidad di gobernacion, Minister di Finansa a wordo confronta cu un situacion na unda cu SVB, AZV, APFA y comercio no tabata ricibi e fondo y pagonan necesario di Gobierno. E presupuesto pa aña 2017 tabata conta cu un deficit extra di 130 miyon cu mester a wordo atendi cu urgencia ya cu esaki lo a trece Aruba den problema cu e supervicion financiero y cu credibilidad financiero di nos Pais cerca compania di rating y inversionista cu ta yuda financia gobernacion di nos Pais. Pero Gabinete Wever-Croes a traha diligentemente pa stabilisa e situacion. Gobierno a duna cara y atende cu ratingbureaus cu ta evalua Aruba su credibildad financiero presentando un Memorando Financiero Economico pa mustra e caminda cu Gobierno lo cana pa recobra e credibilidad financiero di Aruba. A base di e memorandum aki Gobierno a sera un Protocol cu Hulanda pa asina traha riba e confiansa cu Reino mester tin den Aruba su capacidad pa resolve nos mesun problemanan financiero. Consecuentemente a cuminsa haci cambio por medio di un reforma fiscal buscando un balansa pa yega na e fondonan necesario basa riba un sistema fiscal cu ta mas simpel y husto pa e cuidadano di Pais Aruba. Na e mesun momento Gabinete Wever-Croes a atende cu e gastonan di gobernacion, specialmente cu e gastonan di personal y cu e gastonan di interes relata na e debe. Den tur esaki ta creando espacio financiero pa keda inverti y tene e hende central.


Si laga bay, e situacion por bira pio
Tur hende por traha debe y crea problema financiero pa Pais y despues cana bay y spera cu no tin consecuencia y cu Pueblo no lo sinti efecto di e actonan aki. E mandatario a enfatisa cu e realidad ta diferente y si no tabata tin cambio di gobernacion y direccion na nos Pais, awe cosnan por bira pio. Asina cu bo debe crece grandemente esaki ta stroba economia di un Pais y hunto cune e economia familiar. No tin un 'easy way out' den e situacion cu Aruba ta. Keda sin haci nada, no ta un opcion ya cu esey lo haci e situacion pio. Minister di Finansa a duna como ehempel e investigacion di Controlaria General riba e proyectonan PPP cu ta saca na cla e risico financiero cu si Aruba perde credibilidad financiero cu un caida di rating, e suma di inversion di e proyecto di Watty Vos Boulevard, un suma di mas di 400 miyon, lo mester wordo paga di forma mas acelera. Un scenario funesto cu lo trece Aruba den problema financiero ainda mas grandi. Pesey pa evita un situacion pio, Gabinete Wever-Croes ta tumando e pasonan necesario pa haci e debe di Pais Aruba pagabel pa e cuidadano, manteniendo y creando espacio pa inversionnan necesario pa e hende y nos Pais Aruba.