Minister Maduro:Nos a drenta e siman di celebracion di e fecha natalicio di nos Libertador Betico Croes

Ban demostra nos gratitud, Danki na Dje nos ta un Pais cu Status Aparte den Reino Hulandes


Durante e conferencia di Prensa di Gobierno, Minister Xiomara Maduro a brinda informacion riba e siman cu nos ta celebra e fecha di natalicio di nos Libertador Gilberto Francois Betico Croes cu tabata un cuidadano di Pais Aruba, un maestro, un politico y un estadista cu a sa di laga un legado grandi pa nos Pais Aruba.


Manisfestacion Cultural
Pa celebra e fecha natalicio di nos Libertador Betico Croes, Comision Celebracion Dianan Nacional (CCDN) ta organisa un bunita Manisfestacion Cultural cu lo tuma luga diabierna dia 24 di januari pa 7or di anochi riba Plaza G.F.Betico Croes. E popular Grupo di Betico lo deleita nos e anochi aki cu nan concierto cu nan a tene en conexion cu celebracion di nan 50 aña y e anochi special aki lo bay brinda e bunita concierto na henter nos pueblo di Aruba. Durante e anochi aki tambe lo tin un feria culinario Arubano y benta di productonan artesanal.


Ceremonia Protocolar
CCDN ta organisa diasabra 25 di januari pa 9or di mainta te 11’or di mainta e Ceremonia Protocolar cu tambe lo tuma lugar riba Plaza Libertador G.F. Betico Croes.


Invitacion
E mandatario ta extende un invitacion na henter pueblo di Aruba pa asisti na e Manisfestacion Cultural diabierna di 7or di anochi pa 10.30 di anochi y tambe pa acudi na e Ceremonia Protocolar diasabra di 9or di mainta pa 11’or di mainta na Plaza Libertador G.F. Betico Croes.


Danki na Dje
Bini un y tur hunto den union pa asina nos por recorda y celebra e fecha natalicio di nos Libertador Betico Croes. Ban demostra nos gratitud y yama Danki na Dje cu awe nos ta un Pais cu un Status Aparte den Reino Hulandes, cu nos mes Gobierno di Aruba, Parlamento, Himno y Bandera, moneda y ortografia di Papiamento.