Minister Plenipotenciario Besaril:“Mester pone atencion na tur desaroyo den e sector turistico Hulandes Europeo”

​Recientemente e agencianan di viahe na Hulanda a comunica na publico via prensa (De Telegraaf, fecha 31-01-2021) di kier bin cu un plan pa salbaguardia cu e turista Hulandes por bai cu vakantie durante primavera di e aña aki. E plan ta encera entre otro cu tur pasahero lo wordo getest (sneltest) tanto prome cu nan bula como prome cu nan regresa Hulanda. 
 
‘Esaki ta hustamente loke Aruba a bin ta haci desde cu a habri frontera despues di e lockdown na maart 2020’, asina Minister Plenipotenciario Guillfred Besaril ta comenta riba e contenido di e articulo aki. ‘Aruba no solamente a pone un systema di test riba pia na Aeropeurto Reina Beatrix pa tur pasahero cu ta drenta Aruba, ademas a crea facilidadnan p’esnan cu test positivo por bai den cuarantena. Ta pa es motibo aki a introduci un seguro special adicional pa e turistanan cu kier bishita nos isla durtante e pandemia aki cu e miras cu si resulta cu tin infeccion di Covid-19, na Aruba nan lo por ricibi cuido medico sin cu esaki core como gasto adicional pa gobierno. Den preparacion prome cu a habri frontera Aruba a bin cu un certificado pa impresanan den e sector turistico cu na establecemento ta “corona proof” y awe nos ta mira cu e sector di biahe Hulandes ta bini cu un plan cu ta encera varios elemento cu ya nos ta bin ta bin ta aplica for di aña pasa na Aruba, Minister Besaril ta sigui elabora.
 
E mandatario ta sigui declara cu esaki un biaha mas ta mustra e vision di Gobierno di Aruba na tuma pasonan concreto pa brinda perspectiva na e industria turistico local durante di e crisis y asina poco poco pone nos economia bek riba pia. Minister Besaril a termina cu pronto mane cu e plan di agencianan di viahe mane TUI, Corendon, SunWeb, Booking.Com, Beach Masters, keda presenta lo e sinta na mesa di biaha cu functionarionan di ATA Europa pa delibera y mira kico e anuncio aki di e agencianan di viahe lo nifica pa Aruba y den ki forma nos por sigui mantene nos mes como un “top destination” pa e mercado Europeo en general.
 
Riba e potret minister Besaril y director di ATA Europa Tirso Tromp na e gala aña pasa unda ATA Europa a ricibi e award como e miho Oficina di Turismo di Hulanda.