Minister Ruiz-Maduro ta anuncia cu ta flexibilisa e cobransa di boet pa incumplimento cu impuesto pa e periodo 2015-2018

Den conferencia semanal di prensa, Minister Xiomara a anuncia cu ta flexibilisa e maneho di cobransa di boet pa incumplimiento cu impuesto den e periodo 2015-2018 pa asina brinda oportunidad pa por yuda coregi e comportacion fiscal.


Cobransa di boet di manual pa automatisa
E mandatario a splica cu antes e cobransa di boet tabata sosode manualmente na Departamento di Impuesto (DIMP) y door di esaki e tabata tarda promer cu e persona cu no ta cumpli cu pago di impuesto por a ricibi su cobransa adicional y e boet corespondiente. Sinembargo desde april 2018 cu DIMP a finalisa e prome fase di e proceso di automatisacion, e cobransa ta wordo genera automaticamente y pa e motibo aki e persona ta ricibi e cobransa di boet mas liher. Banda di esaki DIMP ta procesando informacion di 2015 pa 2018 y esaki ta trece cune e situacion fastioso na unda cu mas cobransa y boet por yega parew.


Ta flexibilisa e maneho di boet di impuesto
Gobierno a tene cuenta cu e inkietud cu ta reina aworaki den pueblo ya cu tin persona ta hayando e cobransanan di boet un tras di otro. Pa e motibo aki a dicidi pa flexibilisa e maneho di boet entrante 4 di juli 2019 y esaki ta conta pa cobransa di e periodo di 2015 pa 2018. E flexibilisacion aki ta conta pa tur impuesto cu ta wordo paga mensualmente, manera Loonbelasting, BBO, BAZV, BAVP, Toeristenheffing etc. E mandatario ta spera cu e flexibilisacion den e maneho di boet lo por facilita pueblo pa por cumpli cu nan deber fiscal.


Ta hopi importante pa cumpli cu e obligacion fiscal
Pa aña 2019 padilanti nos cuidadanonan mester cumpli cu e Ley manera esaki ta stipula desde aña 2004. Ta hopi importante pa cumpli cu e obligacion fiscal pa
asina no mester paga adicional y tambe pa DIMP por cumpli cu su parti di, entre otro, pa duna restitucion. Na e momentonan aki DIMP ta trahando riba riba e restitucion di aña 2015.


Pronto DIMP ta ful automatisa pa brinda un servicio eficiente
Minister Ruiz-Maduro a subraya cu gobierno a inverti den un sistema di automatisacion di DIMP pa asina por yuda brinda un miho servicio na nos pueblo. Pronto lo introduci tambe mas posibilidad pa pago online y e servicio lo bira mas eficiente.