Minister Xiomara Maduro na sindicatonan: E pensioen di nos Grandinan tambe ta core peliger Awor no ta ora pa negosha y haci wega politico

Den un reunion cu e sindicatonan Minister Maduro a informa nan cu Gobierno ta trahando pa percura pa nos sistema di seguridad social no kibra a consecuencia di e crisis economico financiero fomenta pa COVID19.

E mandatario a mustra a base di cifranan compila pa Departamento di Impuesto pa luna di mei 2020, cu na e momentonan aki tur entrada di prima ta cayendo atras den forma acelera. Esaki ta trece cune cu ya di luna pasa SVB a cuminsa haci uso di su reserva di 3 luna. E mandatario a splica cu normalmente SVB ta ricibi 24 miyon na prima pa luna. Den luna di april a ricibi 20 miyon y na mei a ricibi 17 miyon.

Pues ya caba SVB mester a recuri na 11 miyon di nan reserva pa por completa e 24 miyon necesario. Si entrada di prima sigi baha asina, SVB su fondo pa cual ta brinda seguridad di entrada di pensioen na nos grandinan ta drenta peliger. Minister Maduro a pone enfasis pa splica e sindicatonan cu esaki ta e realidad financiero den cual Gobierno y e Minister di Finansa mester tuma decicion.

​ E realidad aki ta exigi toma di decicion rapido y eficaz, y no ta brinda espacio pa negosha of pa bay haci weganan politico. Ta pensioen di nos Grandinan lamentablemente ta core un peliger real y nos mester atende esaki na un manera serio.