Minister Xiomara Maduro: REBAHO DI PRIJS DI CORIENTE LO YUDA BAHA COSTO DI BIDA PA PUEBLO

​Diahuebs atardi Gobierno di Aruba a yama un conferencia di Prensa extra-ordinario caminda Minister Presidente den presencia di tur ministernan y representante di Utilities, NV Elmar y WEB a anuncia cu tarifa di coriente ta baha entrante 1 di januari 2020 cu 10% pa casnan, 9% pa fundacion, misa, scol y 7% pa comercio.

​ Esaki sigur ta un bon noticia cual lo trece un alivio pa nos comunidad y lo baha e preshon riba costo di bida. Famianan lo spaar pa luna, esey kiermen cu gastonan di coriente lo baha pa luna y pa aña lo nifica un poco mas cu un luna di rebaho pa aña. Mientras cu den otro paisnan tarifa di coriente ta subi, Gobierno di Aruba hunto cu e companianan WEB y Elmar despues di basta estudio ta logra baha e tarifa di coriente.

Cu e hecho aki gobierno ta demostra cu e promesa hasi na pueblo ta wordo cumpli. E rebaho di tarifa di coriente pa comercio lo conduci na rebaho di costo pa haci negoshi cual tin su beneficio tambe pa comunidad. Gobierno lo sigui haci su maximo esfuerso pa baha e costo di bida.