Minister Xiomara Maduro ta informa: E SIMAN AKI IMF Y S&P TA EVALUA E SITUACION FINANCIERO Y ECONOMICO DI ARUBA

E siman aki Fondo Monetario Internacional IMF y e compania di rating Standard and Poor's S&P ta evalua Aruba su situacion financiero y economico. Minister Maduro ta informa cu e biaha aki debi na e pandemia IMF y S&P no lo ta fisicamenta presente den un 'on-site visit' manera custumber, pero nan lo reuni cu tur instancia y persona relevante pa nan por haci un evaluacion debido di Aruba via reunionnan digital.
 
IMF
Tabata na aña 2019 cu Aruba a wordo evalua ultimo pa IMF den su 'Article IV mission.' E tempo ey IMF a keda satisfecho di mira e trabounan cu Gabinete Wever-Croes a haci pa por stabilisa e situacion financiero y economico di Aruba y a indica cu Gobierno di Aruba tabata riba e bon caminda. IMF a premira un crecemento economico pa Aruba y a aplaudi e trabounan cu a wordo haci pa fiha e sectornan prometedor pa diversifica economia di Aruba. Tambe nan tabata tin palabra di elogio pa e reforma fiscal cu a inicia y e acuerdo cu a yega na dje  cu Hulanda den e protocol di november 2018 cu ta basa riba e Memorandum Financiero y Economico presenta pa Gabinete Wever-Croes. Un resumen di tur e trabounan y resultado di e evaluacion di IMF por ser mira via e programa informativo via e link https://www.facebook.com/MinFec/videos/2596260430671186/.
 
S&P
Na 2019 tambe S&P a evalua Aruba y Gabinete Wever-Croes a logra hisa e rating di nos Pais di negativo pa stabiel. Sinembargo na april 2020, na cuminsamento di e crisis causa pa e pandemia di COVID19, S&P a revisa e rating di Aruba su sistema economico y financiero di stabiel pa negativo. E bon noticia tabata cu Aruba a keda mantene su investment rating di BBB+.  Mester bisa cu dia 17 di maart 2020 caba S&P a pronostica cu den e pandemia aki Aruba lo ta na e prome luga di paisnan cu ta depende di turismo y cu lo keda afecta pa e crisis di COVID19. Nos bisiña Corsou mes ta na e di 11 luga y Hulanda ta na di e 72 luga riba e lista aki, djies pa por haya un idea ki efecto e crisis aki tin pa Aruba.
 
Impacto COVID19 riba Aruba
E biaha aki e evaluacion financiero y economico di Aruba door di IMF y S&P lo concentra riba e impacto di COVID19 pa nos Pais. Aruba su economia a cay cu 32.7% den 2020 debi na e crisis economico causa pa e pandemia y pa aña 2021 ta premira cu economia lo crece cu 5.6% si nos turismo recupera. Gobierno a yega na un acuerdo cu Hulanda pa haya yudansa den forma di fiansa cu ta condiciona na reformanan manera palabra den e Landspakket. Esaki ta necesario pa asina por mitiga e efecto di e crisis di COVID19 riba economia di Pais Aruba. Den 2021 tambe Gobierno lo sigui brinda sosten pa mantene e sistema social y economico a base di FASE, Sosten Financiero pa Empresa Chikito y Mediano, y Subisidio di Salario. Esakinan sigur ta yuda pa por stabilisa e situacion financiero y economico na Aruba. Na final di april por spera e resultado di e evaluacion di IMF y S&P.