Minister Xiomara Maduro y Comision Celebracion Dianan Nacional a gradici tur esnan cu a yuda pa haci e Celebracionnan Nacional y Fiestanan Cultural 2019 exitoso

Como muestra di aprecio y gratitud pa e contribucion y cooperacion pa e exito di e eventonan di Comision Celebracion Dianan Nacional 2019, a organisa un encuentro cu tur boluntarionan cu ta yuda den realizacion di e eventonan cu Comision Celebracion Dianan Nacional 2019 a organisa. CCDN ta organisa e fiestanan Nacional “Dia di Betico”, “Dia di Himno y Bandera” y “Dia di Rey” y tambe ta duna sosten financiero, logistico na fiestanan cultural celebra den pueblo manera “Dera Gay”, “Sinterklaas”, “Festival di Dande y Festival Un Canto na Nos Himno y Bandera”.

​Pa por logra organisa e eventonan aki cu exito e comision ta ricibi cooperacion di varios persona y tambe instancia manera Departamento di Cultura, Cuerpo Policial, Departamento di Obranan Publico, Serlimar, IBIZA y ATA.

Minister Xiomara Maduro tabata presente y den su presentacion a gradici tur miembronan di CCDN, boluntarionan y instancianan pa nan bunita cooperacion pa haci e eventonan exitoso pa nos pueblo. E mandatario a haci uso di e oportunidad pa personalmente combersa, expresa su bon deseonan relaciona cu dianan di fiesta y gradici pa e cooperacion y ayudo na cada uno personalmente y como tambe esnan cu no por a asisti. E encuentro tabata masha ameno y esnan presente a aprecia e bunita gesto di Minister di Cultura y Comision Celebracion Dianan Nacional.

Comision Celebracion Dianan Nacional ta sigui cu su trabaonan y ya ta den full preparacion pa locual lo bira e prome celebracion nacional pa 2020 cual ta Dia di Betico, cual lo wordo celebra cu e Manifestacion Cultural cu lo tuma luga dia 24 di januari proximo parti anochi y e Acto Protocolar cu lo tuma luga dia 25 di januari proximo parti mainta. Tin un bunita programa pa ambos evento cual lo wordo anuncia na comienso di e aña nobo 2020. Un biaha mas danki na un y tur como tambe companianan cu a duna aporte financiero pa yuda haci e eventonan un realidad. Felis Dianan di Fiesta na un y tur y ta conta cu e mesun apoyo den 2020.