Mirando caida den Turismo, ta mas motibo pa cuminsa stimula industria chikito y mediano

Pa un pais cu ta depende te ainda practicamente y totalmente riba e industria di Turismo como su pilar economico ta hopi alarmante pa realisa cu awor e cantidad di bishitantenan stayover ta experenciando caida e aña aki atrobe, despues cu na 2016 a sufri caida caba. Esaki sigur ta efectonan ainda di e forma di maneha di Minister di Turismo anterior cu awor ta pretende cu nunca a haci nada robes, manera cu e no a forma parti di e gobernacion actual pa 7 aña y mey largo.
Por a constata cu aña pasa, pues aña 2016, a cera cu un caida den cantidad di bishitante stayover di 10.03%. E aña aki, apesar di por nota cu mercado Mericano a subi, por a constata cu e cantidad total di bishitantenan stayover te cu luna juni 2017 a baha cu 8.66% compara cu e mesun temporada di aña anterior.

Apesar di pronosticonan economico cu Aruba lo bay cera e aña cu crecemento, specialmente manteniendo un scenario cu refineria lo cuminsa cu actividadnan, ta preocupa nos cu tin probabilidad cu e crecemento aki lo no wordo realisa. Si acaso e crecemento economico no realisa e aña aki, esaki lo bira e di 3 aña consecutivo cu Aruba lo bay experencia crecemento negativo den nos economia cu ta significa cu Aruba ta den un recesion.
Ademas, e hecho cu por nota crecemento den e mercado Mericano, mester remarca cu esaki lo por conduci na un bon resultado den e placa cu bishitantenan ta laga atras na Aruba. Sinembargo Aruba ta bolbe bira demasiado dependiente di e mercado aki, ripitiendo e ora e mesun preocupacionnan di pasado.
Parti di e plan di MEP pa yuda stimula y engrandece economia bek ta encera e stimulacion di empresanan chikito y mediano (Small & Medium Enterprises). Aruba no por keda depende demasiado riba un solo of dos pilar so mas. Nos mester siña di pasado y tambe di otro paisnan. Ya den pasado Aruba tawata inverti y stimula nos hendenan mas den e area di plantacion, cria y pesca y ta nos opinion cu esaki por wordo modernisa pa atrobe Aruba cuminsa dedica na e industria aki. Asina por cuminsa pone menos presion riba importacion di algun producto cu ta wordo consumi pa e propio pueblo of tambe e bishitantenan.
E topico di empresa chikito y mediano sigur ta ricibiendo atencion den e region di Caribe tambe. Tin departamentonan na Aruba tambe a cuminsa traha den e direccion aki y nos di MEP ta para cla pa sostene e tipo di iniciativanan aki. Nos hobennan tambe ta para cla cu nan ideanan innovativo y un gobierno mester por asisti y purba guia den esaki pa por bira exitoso. Hobennan merece un oportunidad digno di bin y aporta bek na Aruba cu nan conocemento y ideanan, manera nos tambe a ricibi e oportunidad aki.

---