Na ocasion di CEDEHM su 'teambuilding':Minister Glenbert Croes ta confirma su apoyo incondicional na CEDEHM, Fundacionnan Pro Lechi Mama y Bon nochi Drumi dushi Reconociendo dje forma aki e poder y balor di hende muhe

Na caminda pa celebracion di Dia di Hende Muhe, e departamento encarga cu Desaroyo y Derecho di Hende Muhe esta CEDEHM, a organisa un mainta di encuentro y empoderacion di su team cu tin e tarea grandi pa keda lucha pa igualdad di genero.


Un bunita iniciativa unda cu di un manera informal a comparti cu otro. Durante e rato ameno aki a intercambia di vision y di opinion. E mandatario a bolbe expresa, cu e aña aki mester bira aña di CEDEHM, un departamento cu a wordo lanta a peticion di Nacionnan Uni. Un departamento cu tin e maneho di porta habri pa tur hende muhe cu ta desea conseho y apoyo den cualkier reto cu nan por ta enfrentando.


Empoderando e propio team di CEDEHM, mientras tanto a muda e departamento aki pa nan localidad nobo, un oficina hogar unda tur hende muhe y por cierto homber tambe por yega pa cualkier topico cu por ta di su preocupacion e momento ey. Bou di e mesun dak aki ta ubica Fundacion Pro Lechi Mama y Bon Nochi, Drumi Dushi cu tambe ta conta cu apoyo incondicional di e mandatario.
Tambe CEDEHM ta trahando riba su website ademas di tin un calendario di evento prepara pa 2020 pa empodera e hende muhe.


E mandatario a gradici pa e mainta confirmando su apoyo total na CEDEHM y a dispidi cu e reflexion como e unico hende homber presente: "Tur locual cu un hende muhe por, un homber no por!". Un reflexion pa para keto na dje dunando honor y respet na e balor cu nos hende muhe tin refiriendo tambe na e etapa di reconstruccion cu Pais Aruba ta bibando na man di un gran prome minister cu ta Sra. Evelyn Wever Croes ta desplegando un trabou ehemplar.