Nos no ta papia so, nos ta tuma accion

Lider di MEP Evelyn Wever-Croes y parlamentario Ady Thijsen a reuni cu sr. Anco Ringeling y sra. Solange Tchong di AZV diamars ultimo. 
Durante e reunion AZV a comparti informacion tocante e fondo y su situacion financiero. Tambe a papia di planes den e futuro cercano cu lo tin un efecto riba e fondo. 

GOBIERNO NO TA PASA PLACA DI BAZV PA AZV 
Preocupante ta cu AZV no ta haya tur e placa di BAZV di Gobierno manera mester ta. "Si gobierno ta cobra pueblo BAZV pa cuido medico, nan mester manda esaki pa AZV y no keda cune pa paga nan gastonan di campaña, cu ta hopi halto den e dianan aki. Nos lo manda un carta pa minister di salubridad y di finansas pa nan duna cuenta dicon nan no ta pasando e placa pa AZV. 

MEHORA CUIDO DI SALUD
Nos a papia extensamente cu AZV di e cuido di salud actual, cu tin hopi keho den comunidad, y con por mehora esaki. Den nos vision di MEP nos kier enfoca mas riba prevencion. Un di e proyectonan di prevencion ta di inclui estilo di bida saludable den curiculum di scolnan. Y siña e muchanan desde chikito tocante remedinan di tera. Duna agricultura, cria y pesca mas prioridad den maneho di gobierno. 
Nos kier bin tambe cu un chekeo medico obligatorio, pasobra esey por scapa hopi sufrimento si detecta un malesa na tempo y e ta scapa AZV hopi placa. 
Especialmente ora ta trata malesanan hereditario, un chekeo asina ta necesario. Prevencion lo trece un alivio den e situacion di cuido di salud, pero riba termino largo. 

Locual nos mester haci riba termino corto ta corta e tempo di espera. Nos a papia extensamente di busca mas specialista pa atende cu patient, con pa stimula nos hobennan pa bay studia enfermeria y kico mester haci pa alarga e orario di sala di operacion y pa haci testnan na hospital. 
Den e siguiente dianan lo mi elabora mas riba e diferente solucionnan cu nos a papia cu AZV pa mehora e cuido di salud. 

E reunion a bay bon y mi ta gradici sr. Ringeling y sra. Tchong pa comparti e informacion cu nos. Nos no ta papia so, nos ta tuma accion, pasobra bo salud ta nos prioridad" lider di MEP Evelyn Wever-Croes a duna di conose.