Pa Evita cu Corona Virus plama: DEPARTAMENTONAN PUBLICO LO MESTER PRACTICA DISTANCIAMENTO SOCIAL

Den Conferencia di Prensa di Gobierno di Aruba diabierna atardi 13 di maart 2020, Prome Minister Evelyn Wever-Croes a anuncia cu COVID19, Corona Virus a drentra Aruba. Gobierno di Aruba hunto cu expertonan ta haciendo tur posibel pa evita cu e virus ta plama.


Gobierno ta responsabel pa esnan cu ta traha den sector publico y a duna instruccion na tur hefe di departamento di Gobierno. Diadomingo tur hefe di departamento a wordo informa cu e meta di Gobierno ta pa contene y evita pa e virus sigui plama. Departamentonan lo mester practica Distanciamento Social (‘Social Distancing’), evitando asina mucho contacto di hopi hende hunto. Traha mas tanto posibel for di cas pa asina no tin hopi trahado ni publico na trabou mientras cu servicio por continua.


Pa tur cu no por haci trabounan for di cas, Gobierno ta pidi departamentonan pa bin cu cambio di orario pa servicio y cu un sistema di rotacion pa asina no tin contacto cu mucho hende mientras ta duna servicio.


Departamentonan a wordo pedi pa traha nan plan den otro y entrega esaki na e minister concerni di e departamento mas lihe posibel.


Empleadonan publico cu tin kebrante di salud, of ta den e circumstancia cu no tin hende pa wak pa nan yiunan, of pa esnan mas vulnerable cu tin cancer por ehempel of esnan mayor di edad, ta wordo pidi tambe pa yega na un areglo cu nan hefe di trabou.


“Gobierno di Aruba ta confia cu hefenan di departamento hunto cu trahadonan, na un forma responsabel ta yega na un reparticion di trabou pa e siman nos dilanti. Fin di siman Gobierno lo evalua si mester prolonga esaki. Nos meta ta pa contene e virus aki pa e no sigui plama. Den esaki nos tin mester di e compromiso y responsabilidad di cada ciudadano di Pais Aruba”, Prome Minister Evelyn Wever-Croes a enfatisa.