Pa Partido MEP, Enseñansa ta un prioridad

Enseñansa ta ocupa un funcion cardinal den desaroyo di un pais. Enseñansa mester ofrece tur hende espacio pa nan por desaroya tur conocemento, habilidad y actitud cu nan mester, pa nan por funciona bon y logra exito den nan bida.

Ta importante pa henter comunidad y sector di enseñansa en particular haci su maximo esfuerso pa sigura cu cada ciudadano por siña durante henter su bida y asina desaroya y progresa. Nos meta ta: mas graduado, menos “dropouts”.

Hunto lo mester hisa e balor y aprecio pa enseñansa den nos comunidad. Lo cultiva un ambiente di concientisacion pa tanto mayor, e bario, instancianan social y educativo y comunidad en general, sostene e scol den su tarea importante di educacion y enseñansa di nos futuro generacion.
Un pueblo educa ta un pueblo cu vision y futuro. Educacion ta e forma mas efectivo pa combati pobreza y problemanan social y trece desaroyo economico.

CALIDAD DI ENSEÑANSA:
Enseñansa mester brinda e alumno e oportunidad pa e por desaroya su mes den un forma optimal. Esaki mester sosode den un ambiente sano y sigur. Mester tene cuenta cu e habilidad y talento di cada alumno. Pa por brinda un enseñansa optimal mester percura pa e condicionnan necesario t’ey. Pa por logra esaki e siguiente aspectonan lo tin prioridad den e proximo gobernacion:

Maneho di idioma:
• Duna e ortografia di Papiamento adapta su base legal via nos parlamento. E maneho di idioma Papiamento mester wordo defini basa riba e resultadonan di e proyecto piloto “Scol Multilingual” na scolnan basico. Na momento di e implementacion di Papiamento na scolnan, mester aloca fondonan pa por realisa esaki. Den e maneho di idioma lo evalua introduccion di “prisma-project” pa tur mucha na tur scol basico.

Curiculo actualiza:
• Curiculo basa riba e habilidadnan necesario (“skill based”) pa por funciona den comunidad y mercado laboral. Nos lo introduci un curiculo nacional cu material interactivo, yamativo y textualmente na e situacion di Aruba, cu ta core di e nivel preescolar te na e nivelnan mas halto di enseñansa pa adulto. Lo amplia e curiculo cu formacion ciudadania, historia di Aruba y e lucha pa Status Aparte. Tambe habilidad pa ta proactivo, forma y defende propio opinion y cuminsa mesun negoshi.

Crea condicionnan:
• Cumpli cu 7% di GDP dedica na enseñansa,1% mas cu lo cual UNESCO ta pidi tur pais pa aloca, pa logra nos meta. Lo duna guia extra na studiantenan cu ta core riesgo pa asina evita e fenomeno di “drop outs” (haci uzo di trahado social y considera programa di prisma si ta
lenguahe ta e problema). Conticuamente lo evalua y monitoria e calidad di enseñansa y adapt’e unda ta necesario.

Amplia ayudo y sosten na docentenan:
• Percura pa e docentenan tin e condicionnan necesario pa por eherce nan trabao manera
mantene tur scol preparatorio y basico na cantidad maximo di 27 alumno pa klas (preferiblemente uza 22 alumno pa klas como norma). Participacion real lo wordo duna na maestronan den mehoracion y innovacion den enseñansa. Lo percura pa tur scol tin un “zorgteam” (posiblemente cu trahado social) cu por asisti e maestro debidamente. Lo amplia e uzo di asistente di klas unda esaki ta rekeri. E asistente lo haya un educacion pedagogico/ didactico.
​
Infrastructura:
• Pa por siña, un alumno mester por traha den un ambiente sigur y sano. MEP lo mehora e infrastructura y haci mantencion structuralmente na scolnan, pa garantisa tur scol un edificio sano y moderno. Nos lo percura pa nos alumnonan y maestronan tin siguridad den nan ambiente social y emocional na scol, liber di droga, alcohol, violencia y intimidacion.

Ns lo pone e fondonan necesario pa construi e MAVO-HAVO-VWO na Noord.
Enseñansa a wordo laga un banda den e ultimo añanan y no a gosa di prioridad di e maneho di e gobierno actual. MEP lo cambia esaki y duna prioridad na educacion di nos yiunan pa asina tur mucha por gosa di un enseñansa di calidad. Dia 22 di septemer, brinda bo sosten na sra Evelyn Wever-Croes y Partido MEP pa garantisa enseñansa di calidad pa nos muchanan. Ban hunto p’e cambio.

---