Pa sali exitoso di e crisis, comunidad mester uni y mantene su mes na e dos principio: DISCIPLINA Y CURASHI.

Durante e conferencia di prensa di Gobierno di Aruba pa duna informacionnan tocante e maneho di Covid-19, Prome Minister Evelyn Wever-Croes a enfatisa cu pa sali exitoso di e crisis cu e virus a trece cu ne, ta necesario pa e comunidad uni y cada un mantene su mes na e dos principio: disciplina y curashi.


Disciplina door di mantene e distancia. Ainda tin hende ta puntra dicon nos mester mantene e distancia si nos tin cero caso positivo. Un di e motibonan, Prome Minister a enfatisa, ta cu nos no tin garantia cu e virus aki no ta na Aruba mas. Berdad ta cu nos no tin caso positivo registra pasobra no tin niun hende cu tin e virus aki awor. Pero no tin garantia. P’esey ta keda e responsabilidad di cada ciudadano pa cuida su mes door di tene distancia di otro hende. Hygiena ta keda un conseho y necesidad; laba man cu habon mas frecuente cu ta posibel apesar cu tin cero caso aki na Aruba. Asina bo ta cuida bo mes y e ta yuda cu bo inmunidad y cu bo salud y alabes bo ta yuda pa cu e maneho pa combati e virus. Si un ciudadano tin e prome sintoma di griep, porfabor yama dokter di cas pa haci un cita y haci e test pa asina exclui cualkier cos.


Curashi y sin miedo pa nos por sigui desaroya nos economia y habri nos sectornan. E update di DVG pa diamars 9 di juni ta indica cu ainda tin 77 persona den cuarentena. E grupo grandi cu a bin di Colombia dos siman pasa a sali di cuarentena, nan 14 dianan a pasa. Informacion ricibi tawata cu nan a comporta nan mes bon den e cuarentena. E controlnan cu ta tumando luga tawata efectivo. Esnan den cuarentena ta inclui e grupo di persona cu a bin di Hulanda diasabra ultimo cu tawata nos residentenan cu tawata pega na Hulanda y algun studiante cu a haña permiso pa cuminsa bin. Esaki ta cu KLM cu ta trece nos remedinan un biaha pa siman.


Prome Minister ta urgi e 77 personanan aki, pa mantene nan mes na e reglanan di cuarentena pa e siguiente 14 dianan. Pues keda paden, mas tanto isola di otronan sin contacto pasobra ta hopi importante pa yuda combati pa no haña plamamento di e virus aki.