Premier Evelyn Wever-Croes den Parlamento: NOS TA DEN NEGOSACION CU HULANDA AINDA Y NO A ACEPTA NADA TE CU AWOR

Premier Evelyn Wever-Croes diahuebs a duna Parlamento un update di e negosacionnan cu Hulanda te cu awor. Premier a indica kico tur a logra te cu awor, y na final a indica riba cual puntonan ta negociando ainda.


Riba e tema di supervision financiero, Premier a indica cu Hulanda no kier laga e exigencia los cu mester bira un Rijkswet. Hulanda a indica cu nan tin confiansa den e Gobierno aki, pero no sa cual Gobierno lo bin despues. Y Parlamento a demostra caba con facil por cambia un ley “landsverordening”. Si Hulanda ta bay presta nos mas di 600 miyon florin, nan kier tin un supervision mas fuerte, den un rijkswet.


Premier Wever-Croes a indica cu ken cu presta Aruba mas di 600 miyon florin, lo impone condicionnan cu ta bay hopi leu. Di otro banda Gobierno di Aruba a logra si cu Hulanda ta tuma dos aña di refinanciamento di debe di Aruba na interes abou, cu ta duna Aruba tempo pa recobra forsa despues di e sla serio di Covid, sin cu nos mester preocupa cu e rating agencies internacional.


Tambe Gobierno a logra un palabracion di un salida di e rijkswet segun criterianan mas obhetivo. E rijkswet lo ta valido pa 9 aña, y si Aruba cumpli mas lihe, por sali afo mas lihe tambe.


Pa loke ta e “landspaketten”, Gobierno a logra hopi aclareacion. Entre otro cu e entidad lo no tin un rol den e decision si mester bende accionnan di compania estatal of no. E tema di dolarisacion a wordo posponi pa 2022 despues di haci un investigacion y pa e aumento di edad di pensioen lo haci un estudio prome si mester aumenta esaki pa 66 aña na 2025.


Pa loke ta entidad Gobierno di Aruba a logra limita e autoridad di e entidad y subraya cu lo no acepta cu e entidad lo sinta riba stoel di Gobierno y sigur no Parlamento. Sinembargo ainda tin puntonan cu ta haci e pakete inaceptable riba cual ainda ta negociando.


Premier a finalisa splicando Parlamento cu Aruba ta den un problema financiero hopi serio awor y nos so no por sali afo. Nos mester di ayudo. E ayudo aki lo yuda nos re construi un economia mas fuerte, un autonomia mas fuerte pa un Aruba mas fuerte.


Premier Evelyn Wever-Croes a pidi cada Fraccion den Parlamento y e miembro independiente den Parlamento, pa contesta dos pregunta:
(1) Si nan por bay di acuerdo cu e pakete manera cu e ta awor y (2) si e contesta ta no, kico ta e alternativa.
Parlamento den su totalidad a rechasa loke tin riba mesa awor.


Fraccion di MEP tabata e unico cu a duna alternativa real y a indica unda nan lo kier mira cambio den e proposicion actual y a pidi Premier Evelyn Wever-Croes pa sigui negocia cu Hulanda.


Fraccionnan di POR, AVP y RED no a duna ningun alternativa. Y miembro independiente Daphne Lejuez tabata ausente den henter e reunion.


Gabinete Wever-Croes ta cumpli cu reglanan di bon gobernacion y den cuadro di transparencia a organisa e di tres consulta cu gremionan y Parlamento. A base di e opinionnan expresa den e consultanan, Premier Wever-Croes lo sigui e negosacionnan.