Ultimo dianan Aruba ta registrando un cantidad record di casonan nobo. Y esaki ta conduci cu Gobierno di Aruba hunto cu Crisis Team mester introduci medidanan nobo. Diaranson anochi durante e conferencia di prensa di Gobierno di Aruba pa informa riba e ultimo desaroyonan di Covid-19, Prome Minister Evelyn Wever-Croes a elabora riba e medidanan aki y a duna di conoce tambe cu diabierna lo informa detayadamente riba e reglanan nobo.

Cuminsando diabierna tur trahado mester tin tapaboca bisti constantemente riba boca y nanishi na trabou. E medida aki a wordo tuma door cu e origen di contacto pa 40% ta na pia di trabou. Reglanan di distancia y higiena ta keda vigente. E 60% di origen ta tuma luga den famia, na casnan.

“P’esey ta haci un apelacion urgente na cada ciudadano di pais Aruba pa evita di sigui plama e virus aki. Pa complementa e medidanan aki pa fin di siman, lo bin un shelter in place, un ley seco of ambos pero esaki lo wordo anuncia diabierna. Esaki ta pa forsa pa stop aglomeracionnan. Tur esaki ta necesario pasobra mester baha e cantidad di casonan cu nos ta mira tur dia”, Prome Minister a expresa.

Prome Minister ta haci un apelacion na comunidad completo pa keda positivo.
​
“Keda busca e lus na e fin di horizonte pasobra e tey. Si bo ta negativo ta obstaculo so bo ta busca pero si bo ta positivo bo ta wak oportunidadnan. Aruba tin hopi oportunidad, loke nos mester haci ta baha e cantidad di casonan cu nos ta constata pa dia pa asina nos por enfrenta y mira tur e oportunidadnan tambe”, Prome Minister Evelyn Wever-Croes a expresa.

Dialuna 14 di september 2020 e soño di un Academia di Ley a bira realidad. Caribbean Centre for Legislation di Universidad di Corsou hunto cu Universidad di Aruba y Ministerio di Enseñansa, a insititui e Aruba Desk di e Caribbean Centre for Legislation. E Aruba Desk aki a haci e soño pa Aruba por tin un Academia di Ley, bira realidad. Cu e Academia aki Aruba lo haya huristanan nobo cu ta specialisa den traha y cambia ley, algo cu tabata un necesidad grandi pa hopi aña. Pa Aruba 20 cursista ta cuminsa cu e curso, cu despues lo amplia nos capacidad di traha ley cu 100%.


Premier Evelyn Wever-Croes a duna di conoce cu den e Masterplan “Reposicionando e rumbo di nos pais” ta menciona ampliacion di nos capacidad di cambia y traha ley, como un acelerador pa por reactiva nos economia. E velocidad di gobernacion y di ehecuta cambio y reforma den nos pais, ta depende di e velocidad pa cambia y traha ley. Nos tin un ekipo di hurista specialisa den e area legislativo, hopi profesional y cu ta traha cu hopi dedicacion, pero e trabou ta hopi. P’esey ta asina importante pa atende cu e problema aki awor. Como un di e aceleradornan menciona den e Masterplan cu lo reactiva nos economia, e curso aki pues ta sumamente importante pa e futuro di nos paisnan.


Cu esaki Gobierno di Aruba ta mustra un biaha mas e compromiso pa cuminsa cu reforma, sin warda mas.


“Nos no por keda warda riba Hulanda, nos mes mester cuminsa. Pasobra na fin di dia Aruba ta di nos, y ta nos responsabilidad pa hiba nos pais padilanti. Hulanda of otro paisnan por yuda, pero ta nos mester haci’e, y nos tin suficiente profesional cu ta stima nos pais pa yuda nos haci’e”, Premier Wever-Croes a indica.


Premier Evelyn Wever-Croes, Minister di Enseñansa Rudy Lampe y Minister di Husticia Andin Bikker a traves di un saludo virtual, a desea tur e cursistanan hopi exito y perseverancia, y a enfatisa cu e contribucion di e cursistanan na e reconstruccion di nos pais, ta crucial.

Premier Evelyn Wever-Croes den conferencia di prensa semanal, a enfatisa cu no mester romantisa e ‘deal’ cu Hulanda. Premier a indica cu el’a tuma nota cu varios comerciante tin un ansha pa Aruba firma cu Hulanda, pero ta parse cu nan no ta consciente kico mester wordo firma.
​
“Si ta asina nan ta maneha nan negoshi, nan lo no ta hopi exitoso, pasobra den negoshi tampoco bo ta yega y firma ‘bij het kruisje’. Ami ta un hende responsabel, mi a traha den sector publico y den sector priva, y ami no ta djis firma sin pensa riba e consecuencianan. Si mi sa cu firma un acuerdo awe, ta causa problema dentro di poco, mi ta atende cu e problemanan ey prome cu firma. Esey ta e forma responsabel pa maneha. Pues no pidi di mi pa firma ‘blindelings bij het kruisje’, pasobra si ta esey nan kier, nan mester a scoge un otro Prome Minister. Nos ta den negosacion y si nos mester firma mes, por lo menos nos mester purba tin un bon deal prome cu firma”, Premier Wever-Croes a duna di conoce.

ROMANTISA HULANDA
Premier Wever-Croes a referi tambe na e hecho cu tin algun hende cu ta pensa cu si nos firma, mesora tur problema di Aruba ta soluciona.
“Esey ta un pensamento ekiboca. Ta e mesun Hulanda, cu algun hende ta romantisa, kier pa nos corta 35 miyon florin den cuido di salud. Ta e mesun Hulanda kier pa nos corta den salario di specialista. Ta e mesun Hulanda kier pa cuminsa elimina ‘loon subsidie’, ta nos ta purba wanta esaki pasobra nos sa cuanto comerciante y trahado ta depende di e ‘loon subsidie’. Ta e mesun Hulanda kier un entidad cu ta dicidi su mes, cual inversionistanan por bin Aruba y kico nan ta bin haci na Aruba y kico tur nan por cumpra na Aruba, pero nos ta purba trece un balance den esaki pa protehe nos comerciantenan local y nos ciudadanonan mes. Ta e mesun Hulanda aki ta bin cu condicionnan draconico, cu di adelanta nan sa cu Aruba no por cumpli cu nan, Premier Wever-Croes a duna di conoce.

E mandatario principal a afirma cu Gobierno Aruba ta sigui negocia cu Hulanda na bienestar di nos pueblo pa yega na algo aceptabel tanto pa Aruba como pa Hulanda.

“Mi ta kere cu ora cada ciudadano di nos pais pone tur esaki den balansa, nan ta realisa cu berdad ta miho pa Gobierno di Aruba sigui negocia cu Hulanda y purba yega na algo cu ta aceptable pa tur partido. E retonan cu nos pais ta enfrenta, ta nos mes mester surpasa nan. Nos no mester pretende cu otro ta bin soluciona nos problemanan pa nos. Talves nan por yuda nos, pero nos mester soluciona nos problemanan. Pues ban keda
cabes frieu, y no ban romantisa e ayudo di Hulanda. Ta parse cu Hulanda no ta interesa den yuda nos cu e sosten di likides cu nos mester pa sobrebibi, pa por hala rosea. Hulanda ta parse mas interesa den reforma y cambionan prome cu yuda nos cu e rosea. Awor Aruba ta manera un patient cu a yega hospital sin por respira. Prome cos cu nos mester, ta oxigeno pa por respira. Pero loke Hulanda ta parse di kier ta pa nos reforma y despues por haya oxigeno”, Premier Wever-Croes a expresa.

TA SIGUI NEGOCIA
Premier Wever-Croes a duna ci conoce cu awor cu Gobierno di Aruba a haya poco rosea financiero atrobe, por sigui negocia. Premier Evelyn Wever-Croes ta spera di por yega na un deal cu ta husto pa Aruba. Mientras tanto Premier y su team a lora manga y cuminsa traha caba riba reformanan cu tin mester.

“Pasobra nos no por keda warda riba Hulanda mas. Nos mes tin hendenan y potencial cu por yuda nos pa cuminsa cu e trabou aki, y tur cu kier yuda, ta bon bini”, Premier Wever-Croes a enfatisa un biaha mas.

Siman pasa diabierna atardi Minister Maduro tabata presente na Departamento di Impuesto DIMP pa e despedida di sr. Rudolf Boezem kende ta baha cu pensioen.
​
Riba su ultimo dia di trabou coleganan di trabou di sr. Boezem a organisa un encuentro ameno pa demostra nan aprecio grandi pa nan colega cu ta bay cu pensioen bon mereci. No solamente e departamento ta perde un experto di controle riba loonbelasting pero su coleganan sigur lo haya falta di e abilidad di Sr. Boezem di comparti su experticio, pero mas cu tur un super bon persona y colega pa su demas coleganan. Minister Maduro a gradici sr. Boezem y a brind'e un recuerdo pa su servicio loyal na Pais Aruba. Masha danki Sr. Boezem y hopi exito den e etapa nobo di bida como pensionado.

Un otro ley cu a pasa siman pasa den Parlamento cu tin di haber cu integridad ta e Ley di Financiamento di Partidonan Politico. E ley aki ta hopi hopi importante. Corupcion ta cuminsa un caminda. Tin biaha e ta cuminsa prome cu un persona of politico ta den gobierno caba, dus durante campaña electoral. Nos por a mira eleccionnan anterior cu un partido tabata tin hopi fondo na su disposicion, hasta pa haci un campaña gigantesco. Nos a mira tambe cu un sponsor di ex prome minister Mike Eman, Roberto Rincon, despues di a haci donacion di 50 mil dollar na e campaña di sr. Eman, a haya a cambio tereno y cantidad di vergunning, sin mester a pasa screening. Esaki ta un ehempel clasico di corupcion den financiamento di campañanan electoral. Cu e Ley di Financiamento di Partidonan Politico ta bin un paro na e comportacion coruptivo aki, Prome Minister Evelyn Wever-Croes a duna di conoce.


Prome Minister a expresa cu mientras donacion y yuda un cantidato den su campaña ta posibel, pero na midi y cu transparencia, un Partido politico por haya donacion te cu 3000 florin cu e Partido mes mester registra. Riba 3000 florin pa aña, e Partido mester publica esaki. Riba 30 mil florin ta prohibi. E mesun tipo di regla ta conta pa cantidato individual riba sumanan mas abou.


E Ley di Financiamento di Partidonan Politico ta drenta na vigor na januari proximo y Partidonan politico mester entrega tur aña un relato obligatorio na e comision bou di Conseho Electoral pa declara unda e ta haya su fondo y of loke el a haci pa yega na e fondo. “Esaki ta crea un transparencia hopi importante”, Prome Minister a enfatisa.


Candidatonan mester entrega nan relato anual di origen di nan fondo electoral entre 14 pa 21 dia prome cu eleccion. Y si e haya mas despues di a entrega e relato, e mester entrega esaki despues tambe.


“Esakinan ta e reglanan di e Ley di Financiamento di Partidonan Politico cu lo trece un ‘level playing field’ y transparencia den politica na Aruba. Pasobra den futuro, ora cu Integriteits kamer evalua destahonan publico cu ta tuma luga door di Gobierno, semper por bay bek riba e Ley di Financiamento di Partidonan Politico y wak e registro di tur esnan cu ta haci donacion na partidonan politico, compara nan cu e destahonan publico y di ey por comproba si tur cos a bay segun regla di integridad.


Nos speransa ta cu esaki ta bay traha preventivo y pa tur hende atene nan mes na e reglanan stipula pa asina transparencia y integridad vence tambe den e proceso electoral”, Prome Minister a enfatisa.

Prome Minister Evelyn Wever-Croes dialuna mainta durante conferencia di prensa semanal di Gobierno di Aruba a enfatisa cu Aruba a habri un siman di hubilo cu e dos leynan cu a pasa siman pasa den Parlmanto. E ley di Defensor di Pueblo, Ombudsman y e Ley di Financiamento Politico. Esaki, segun Prome Minister nos por considera un hubilo pasobra Aruba ta e prome pais den Reino cu no tawata tin un Defensor di Pueblo.


E Ombudsman ta Defensor di pueblo, cu lo brinda proteccion na pueblo. Caminda cu un ciudadano por acudi ora cu e ta sinti su mes perhudica of cu su derechonan no ta keda respeta door di Gobierno, instancianan semi-gubernamental y otronan cu lo cay bou di e ley aki. Ombudsman of e Defensor di Pueblo ta un institucion independiente y imparcial. E Defensor di Pueblo mester evalua kehonan encuanto diferente aspecto di e aparato gubernamental y semi-gubernamental. E mester defende e interes di e ciudadano y supervisa e calidad di e servicionan publico den un pais. Cu otro palabra E Defensor di Pueblo lo yuda comunidad investigando nan keho y of denuncia.


Tambe lo bay tin un ‘KinderOmbudsman’ kende lo atende especialmente cu temanan di abuso fisico y sexual di mucha, derecho di mucha riba enseñansa, amor, cariño y tur loke ta concerni nos muchanan.


Awor cu e ley a pasa, lo atende cu e siguiente pasonan. E prome ta pa ancra Defensor di Pueblo den nos Constitucion. E Ley ta na Parlamento pa wordo trata proximamente. E siguiente paso ta pa cuminsa e proceso pa busca un Defensor di Pueblo cu lo bay ta un nombramento haci door di Parlamente y totalmente independiente di Gobierno mustrando asina e importancia di e nombracion aki. Tambe lo mester cuminsa traha riba e oficina di e Defensor di Pueblo cual gasto ta cay bou di e presupuesto di Ministerio di Asuntonan General. Tin fondo disponibel y e kwartiermaker señora Sahaira Kelly ta encarga pa asina pronto e oficina di Defensor di Pueblo wordo realisa.


“Pabien na Parlamento cu e Ley di Ombudsman. Esaki ta un ley di iniciativa di tur fraccion den Parlamento pa mustra e union cu tin tambe riba e tereno aki. Ya caba desde cu mi tawata den Parlamento tur fraccion a uni den e ley aki cua ta un señal di unidad importante y bunita”, Prome Minister Evelyn Wever-Croes a expresa.

Siman pasa Premier Evelyn Wever-Croes a duna un update di e negosacionnan cu Hulanda, cu ta bayendo dificil. Hulanda ta cambia condicion cada rato, y no ta haya necesario pa discuti esakinan cu Aruba. “Pero, manera semper nos a haci, nos no a bay yora, of bay den welga di hamber. Mesora nos a lora manga y nos a bay busca financiamento, y awe mi por informa bo cu nos a haya institutonan interesa si Hulanda no kier presta nos! Cu e financiamento aki, nos ta cubri nos debenan di e lunanan september y oktober, pues salarionan di sector publico, subsidio di salario di sector priva, FASE, sosten na empresanan chikito y mediano. Y mas importante: gastonan di cuido di salud, pa por paga AZV, Boticanan, dokternan, y pa cubri e gasto creciente di Covid crisis”, Premier Wever-Croes a duna di conoce. Segun e Premier esaki ta un bon noticia, pasobra e ta mustra cu poco poco pero sigur, e confiansa den Aruba riba mercado financiero, ta bolbiendo.

SIGUI NA MESA DI NEGOSACION CU HULANDA
Aruba ta keda na mesa cu Hulanda pasobra e fiansa na 0%-interes ta mas favorable cu tin, pero e condicionnan mester ta condicionnan cu ta funcciona na Aruba, pasobra sino e propio condicionnan lo hinca Aruba den problema serio dentro di poco. Den e condicionnan tin un cantidad di deadline cu mester wordo cumpli riba termino corto, cu mirando e capacidad cu tin na Aruba, y mirando e crisis cu Aruba ta combatiendo pa scapa bida di hende, lo no por cumpli cu tur e deadline nan ey.

“Nos kier reforma na nos pais, nos no tin problema cu supervision ni tampoco cu mas control. Pero e mester ta na un forma cu nos pais por traha cu ne. Si Hulanda compronde e situacion real cu nos ta aden, y si Hulanda ta dispuesto na negocia na un forma husto, nos por yega na un bon deal pa Aruba. Pero awor, esey no ta e caso, y danki Dios, nos a logra un otro alternativa”, Premier a duna di conoce.

Premier a informa Parlamento di Aruba y gremionan comercial, sindical, y lidernan politico diahuebs mes, y ta di opinion cu asina e incertidumbre y e ansha cu tabata tin den comunidad, por pasa y trankilidad por bolbe. Gobierno tin e fondonan pa sigui cumpli cu su pagonan, y pa cumpli cu e sosten na sector priva. Pues sector publico por ta trankil y sector priva por ta trankil.

REFORMA
“Mes momento nos si ta cuminsa ehecuta nos plan di reforma, e masterplan “Reposicionando rumbo di nos pais”, cu a wordo traha pa 250 profesional local, pasobra nos no por warda mas. Nos a apunta un comision di implementacion y nan lo cuminsa mesora cu e 5 aceleradornan,
​
cu ta: eliminacion di burocracia y red tape, revision di leynan laboral, reforma di nos sistema di impuesto pa uno mas husto, digitalisacion di procesonan den gobierno y ampliacion di nos capacidad di traha y cambia ley. Una bes nos atende cu e aceleradornan aki, e demas reformanan lo bay mucho mas lihe, y nos lo logra nos meta mas lihe. Esaki ta e plan traha pa NOS hendenan. Y si Hulanda kier yuda nos den esaki, nan ta mas cu bon bini pa yuda nos, pero e ta NOS plan y NOS ta ehecute, y sino, nos lo busca otro fondonan pa financia reconstruccion di nos pais. Pasobra e pais aki ta di nos, y ta nos mester saca e pais padilanti. Tur esnan cu kier yuda nos, ta bon bini. Pero esnan cu kier kibra nos, mester keda leu. Pasobra nos tin un meta: ARUBA MESTER PROGRESA”, Premier Evelyn Wever-Croes a finalisa bisando.

Gabinete Wever-Croes a reuni cu participantenan y contribuyentenan na e “Master Plan Nacional” pa finalisa e proceso di feedback na e rapport. E Master Plan, cu e nomber di “Reposicionando e Rumbo di Nos Pais” ta un documento di 100 pagina delineando Aruba su strategia pa e recuperacion economico y resiliencia pa futuro. Pa yega un draft final, Prome Minister a traha hunto cu funcionarionan di Pais Aruba, gremionan, young professionals, y task forcenan.


Segun e Chief Innovation Officer di Aruba, Varelie Croes, cu a guia e comision cu a facilita e plan, e aspiracion di e plan ta “un transicion exitoso na un modelo economico cu ta sostenibel, inclusivo y resiliente”.


E version actual di e raport ta reparti den dos seccion. E prome parti ta desplega un plan strategico y un framework. Mientrastanto, manera Varelie Croes ta haci referencia, e segundo parti ta e parti mas importante di e proyecto, puntonan di accion pa wordo logra den e siguiente tres añanan.


E ‘steering committee’, cual a vigila e comunicacion entre stakeholdernan, analisis di data y sosten di e proyecto, ta mira dilanti na un transicion di vision pa accion. Segun un miembro scientifico independiente di e comision, “e dosis husto di creatividad, curashi, compromiso y nos toke unico, lo haci e diferencia awe y pa futuro”.


Durante e sesion, participantenan a lansa preguntanan riba puntonan specifico di e rapport, e plan di implementacion y financiamento. Asina mes, e topico di continuidad a sobresali den e combersacion. Prome Minister Wever-Croes a enfatisa cu su Gabinete a trata di evita tendencia politico door di a traha hunto cu un base amplio di Arubianonan di ambos sector priva y sector publico. Mientrastanto a tene Parlamento informa pa sigura cu cambionan politico no lo afecta e conclusion di e Master Plan.


Gobierno ta spera di tene contacto cu e participantenan y e comunidad. Locual ta mas importante aworaki ta pa sigui dialoga. Por haci esaki via town hallnan virtual y eventualmente en persona.


Prome Minister Wever-Croes a cera e sesion gradiciendo tur profesional cu boluntariamente a contribui na e proceso, “Nos ta gradicido na boso dedicacion den e temponan dificil aki”. Gobierno di Aruba su intencion ta pa tin e documento final disponibel na publico y disponibel pa download pa fin di september 2020.

Premier Evelyn Wever-Croes diahuebs ultimo a duna un discurso nacional pa informa comunidad di e desaroyo financiero di pais Aruba, y e negosacionnan cu Hulanda.

Apesar cu e negosacionnan cu Hulanda ta bay dificil, y Hulanda ta cambia e condicionnan cada biaha, y apesar di e desaroyo preocupante di Covid, asina mes Premier Evelyn Wever-Croes a comparti un mensahe di speransa y inspiracion.

“Nos mes por, no laga ningun hende bisa bo cu nos no por. Nos a hacie den pasado caba y nos lo hacie atrobe. Y mi ta compronde cu tin gremionan preocupa, y mi lo tene cuenta cu esey y hunto sigui traha riba solucionnan. Pero pa awor, e problema financiero ta soluciona. Garantia cu lo tin placa pa eternidad sin problema, mi no por duna, y mi no por a duna nunca. Pero si mi por duna e compromiso, cu mi lo no permiti nos pais kibra, y mi lo no permiti ningun otro pa kibra nos pais. Mi ta kere cu den e casi 3 añanan cu mi ta dirigiendo nos pais, mi a demostra un actitud responsabel y hopi serio, ora ta trata finansas. A base di esey mi ta pidi henter comunidad, duna nos e credito y e espacio pa sigui busca e bienestar di nos pais”.

Prome Minister a indica cu tin varios desaroyo interesante nos dilanti. E interes grandi den e refineria y otro desaroyo na San Nicolas. E leasemento di e tankinan na San Nicolas. Turistanan sumamente encanta cu nos isla, y un pa un ta invita otro turista pa bin Aruba. E pilar economico di canabis medicinal. Tur ta desaroyonan hopi prometedor cu nos tin nos dilanti.

“Nos ta bay reconstrui Aruba bek despues di Covid, como un pais den cual inovacion, resiliencia y integridad ta nos motor, y e determinacion, curashi y amor patrio di cada ciudadano lo ta nos forsa. Un Aruba cu un economia mas fuerte y un autonomia aun mas fuerte.

Prome Minister a gradici henter comunidad, pa bo sosten, pa bo palabranan di encurashamento, pa bo oracion, pa bo pasenshi, pa bo confiansa.

“Mi kier gradici tur esnan cu ta traha incansablemente pa yuda nos tanto riba e tereno di e crisis medico, como e crisis financiero. Mi kier gradici nos sector priva, especialmente nos empresansan mediano y chikito, e weso di lomba di nos pais. Na tur ciudadano di nos pais, danki pa apesar di tur cos, kere den Aruba, y pa duna tur di bo parti pa nos wanta cabes riba awa den e crisis mas severo cu a dal nos pais.
​
Nos ta bay reconstrui Aruba bek despues di Covid. Mi ta invita bo pa ta parti di e movecion aki. Pero un cos si, awor cu nos a resolve e tema financiero por lo pronto, ban resolve e tema di Covid, cu disciplina y cordialidad. Nos por. Nos a enfrenta retonan grandi den pasado, y nos a surpasa nan, den union. Pues nos a hacie caba, y nos ta bolbe hacie”.

For di momento cu Minister President a anuncia den su discurso nacional cu Aruba ta logra yega na fondonan pa por cumpli cu parti di e necesidad financiero pa aña 2020, a bin un ola di pregunta ta di ken y bou ki condicion Gobierno di Aruba ta haci prestamo. Contesta riba e preguntanan aki por wordo haya den presupuesto di Pais Aruba den cual tin tur informacion di prestamo haci.

Lista di prestamo ta publico
Den presupuesto di Pais Aruba, cu ta un documento publico, tin un lista den cual ta figura tur debe cu Pais Aruba tin riba mercado local y tambe riba mercado internacional. Den dje por lesa ki tempo a haci e prestamo, cerca ken a haci e prestamo, si e ta local of internacional, ki interes mester paga y un estado di cuenta di e debe cu informacion riba suma y pago den e aña coriente. Pues e informacion di prestamo no ta algo cu Gobierno ta tene secreto ya cu den tur transparencia e informacion ta inclui den presupuesto di Pais Aruba.


Prestamo via instituto renombra y na condicion rasonabel
Como cu Minister President den su discurso no a duna detayes di e prestamo, a surgi speculacion riba ken lo a fia Gobierno placa y na ki interes esaki lo ta. Ta bon pa sa cu Gobierno di Aruba ta haci prestamo cerca inversionista institucional di renombre y na condicionnan rasonabel. No ta pasobra ta crisis, ta desvia di e liña di trabou aki. Ademas Pueblo por tin e trankilidad di sa cu Gobierno di Aruba ta conta cu un team di hende profesional y serio cu ta atende cu e trabou di busca e fondonan necesario pa cubri e nececidad financiero di Pais Aruba.