​Den e ultimo dianan, casonan di Covid 19 na Aruba ta aumentanto hopi y hopi lihe. E situacion aki ta preocupante. Crisis Team a yama un conferencia di prensa diabierna mainta pa comparti cu comunidad di Aruba kico ta e plan pa e siguiente simannan. Prome Minister Evelyn Wever-Croes a habri e conferencia di prensa dunando un update di e desaroyo di Corona Virus. 
 
Nos por mira e desaroyonan rond mundo na unda cu varios pais ta bayendo den lock down pasobra e situacion ta saliendo for di man. Nos no mester mira mucho leu di nos. E casonan na Boneiro ta aumentando rapidamente, y a decreta medidanan estricto. Na Corsou tambe e casonan activo ta aumentando rapidamente, y eynan tambe a decreta medidanan mas estricto. Na Merca, apesar cu ya a distribui mas di 112 mil dosis di vacuna, asina mes den 14 estado ta mirando aumento di e casonan y aki tambe lo mester tuma pasonan estricto. 
 
E variantenan di e virus ta haci e situacion na mundo hopi mas dificil. Na Aruba no ta diferente. E casonan ta aumentando. Na principio e aumento no tabata hopi, pero e ultimo dianan nos a mira un spike. Kico nos sa di e situacion na Aruba?

• Nos ta den di 3 wave ainda
• Tin 394 caso activo
• Average di casonan nobo ta 50 pa dia
• Tin 31 persona den hospital di cual 11 den ICU
• Nos tin Variantenan di preocupacion: di Inglatera, Sur Africa y di Brasil
• Virus ta wide spread: Di esnan cu ta contagia, hopi no sa of no ta comparti di unda nan a haye y e fuente no por wordo controla y ta bira widespread cu ta un problema grandi.

Pa frena e problema di crecemento di casonan, Crisis Team tin un plan cu escalacion. Si e prome pasonan cu a tuma y lo ta na vigur entrante diasabra 20 di maart 2021, no yuda contene e virus, lo keda escala medidanan. Pa awo e siguiente desicionnan a wordo tuma pa Crisis Team. 
 
- Ta mantene e medidanan actual pero lo enforsa nan cu algun medida adicional. 
- Si esaki no ta efectivo, lo escala rond di 1 april pero cu posibilidad di escala prome cu e fecha menciona dependiendo con e cifranan sigui desaroya. Cu escalacion lo bay na entre otro permiti servicionan esencial so; limita cantidad di hende na trabou, limita servicionan esencial cu 50%. Intencion ta pa kita mas tanto hende for di riba caya. 
 
- Si pa dia 15 di april e maneho aki no duna resultado, lo bay na un paso mas drastico cu lo ta shelter in place. Esaki lo trece consecuencia cu mester cera scolnan, y orario di ciere y di toque de queda mester bira mas trempan, ripitiendo e situacion na unda nos tawata para na maart un aña pasa. 
 
“Nos niun desea esaki. Nos tur kier evita pa e bolbe yega asina leu na unda mester tuma e medidanan aki. Pa e motibo aki tambe, Crisis Team a presenta e pasonan cu lo wordo tuma sperando cu por haya cooperacion di tur ciudadano pa frena e aumento den cantidad di casonan.
 
A base di e cifranan actual nos por tuma e medidanan aki den fase, poniendo den balance tur aspecto: di riesgo di salud; problemanan economico di comercio y doñonan di trabou cu por perde entrada y kita hende for di trabou, salud mental; trankilidad mental di ciudadanonan. Claro, nos lo evalua cada 3 dia pa mira si mester acelera e plan aki of suavisa.
 
Laga nos ta sincero. Nos a mira cu e disciplina a baha y no ta tene cuenta cu e reglanan mas. Mi ta compronde cu hopi di nos a fada di e virus, pero e virus no a fada di nos. E virus tey ainda y ta sigui ranca hende for di nos. Na Aruba 82 persona a perde nan bida cu Covid. E arma pa bringa e enemigo mortal aki ta den nos man. Nos mester sigui cuida door di laba man constantemente of uza handsanitizer, bisti tapaboca y si bo tin sintoma, contacta bo docter. Nos por recupera. Ban sigui cuida pa nos recupera”, Prome Minsiter Evelyn Wever-Croes a enfatisa durante e conferencia di prensa di diabierna mainta.
 

​Siguiendo e recorido pa bishita algun scol na Aruba en conexion cu celebracion di 45 aña di Himno y Bandera, diaranson 17 di maart, Prome Minister Evelyn Wever-Croes hunto cu Minister Xiomara Maduro a pasa na Scol Caiquetio. Cu hopi emocion nan a wordo ricibi cu bunita rosanan cora y geel. Prome Minister a expresa su alegria di por a bishita e scol aki pa di prome biaha. Na yegada di e mandatarionan e cabesante Juffrouw Carolina Quandus hunto cu maestro y alumnonan a canta e Himno di Aruba y hisa bandera riba e speelplaats sigui pa un bunita storia cu actuacion tocante di Himno y Bandera. 
 
Premier Wever-Croes a duna un discurso chikito na unda el a splica cu esaki ta e di 45 aña di Aruba su Himno y Bandera y cu mester celebre hisando e bandera di Aruba y recorda e logronan grandi di Betico Croes, of cu Betico a contribui na nan grandemente. Nos himno y nos bandera ta simbolonan di union y identidad di nos pais. Tambe e hecho cu awe Aruba tin su propio gobierno, su propio ministernan, su propio Parlamento, su propio moneda. Y tur esaki a inculca e sentimento di orguyo den nos Arubanonan.
 
Minister Xiomara Maduro tambe a duna su discurso na unda e la entretene e muchanan un rato combersando riba e dushi cumindanan crioyo cu nan lo por come riba nos dia nacional. Tambe e titular di cultura a papia di e Himno nacional y pa tur mucha cuida nos dushi isla y nos cultura.
 
E mandatarionan tabata tin e oportunidad di bishita klas 5A pa mira con e alumnonan ta haci uzo di e materialnan cu Minister di Cultura a presenta na nan pa nan prepara pa Aruba su dia nacional. 
 
Por ultimo Prome Minister a expresa cu e ta yena di emocion pa por a bishita e scol aki y ta un gran alegria pa mira con hopi e muchanan ta stima nan dushi isla Aruba. Prome Minister a gradici e cabesante y maestronan pa e trabou incansabel cu nan ta bin ta eherciendo y specialmente pa e manera con nan ta prepara e muchanan pa e dia tan special aki. 

Den un mainta di celebracion den cuadro di nos Dia di Himno y Bandera, Colegio Laura Wernet-Paskel a haci uzo di e oportunidad pa reconoce e trabou boluntario di un di nan ex-alumnonan cu, pa hopi tempo, ta yuda mantene e scol den diferente aspecto. Den presencia di Minister President, sra. Evelyn Wever-Croes, y coleganan Minister Xiomara Maduro y Minister Chris Romero, Parlamentarionan y como tambe alumnonan y personal di e scol mes, a duna honor na sr. Andres “Modechi” Werleman door di nombra e hofi di scol na su nomber.

Sr. Andres “Modechi” Werleman no ta un persona desconoci den nos mundo cultural y di agricultura. Fundador di Tipico T.A.K.L.A y un amante di su raiznan Arubiano, Modechi tin un amplio conocemento di Aruba su agricultura tradicional y artesanal. Conoci tambe pa su obranan di man traha cu cadushi, Modechi semper a pone su gran conocemento na disposicion di nos generacionnan di mas hoben, cu e meta pa keda mantene nos identidad cultural lo mas intacto posibel, pero semper dunando espacio pa amplia esaki. Di e manera aki Modechi ta inculca den nos muchanan, for di edad hopi hoben, e amor pa nos Aruba y esaki a keda ilustra un biaha mas den su trabou den e hofi di Colegio Laura Wernet-Paskel.

Aña pasa e Cabesante di Colegio Laura Wernet-Paskel, sra. Bernadetta Figaroa-Geerman, a aserca Departamento di Agricultura Cria y Pesca/Santa Rosa, cu e peticion pa haya un colaboracion pa articula e proyecto di hofi na su scol. Cu hopi alegria y satisfaccion Minister Romero a tuma e peticion aki y, un biaha mas, a impulsa e Departamento pa yuda realisa e hofi di Colegio Laura Wernet-Paskel. Santa Rosa na su turno a sigura di duna apoyo constante den con y kico pa haci pa por tin un hofi productivo, como tambe ta duna e scol gordura pa por mantene e matanan.

​Awendia e studiantenan y personal di Colegio Laura Wernet-Paskel ta gosa di un hofi cu ta produciendo diferente fruta y berdura cu por disfruta caba. Cu hopi orguyo mastronan y alumnonan di e scol a comparti prueba di e fruto di nan hofi cu tur esnan presente, cual a duna e detaye refrescante y cultural na e bunita mainta aki.
Masha pabien na Colegio Laura Wernet-Paskel cu nan Hofi Modechi cu ta produciendo hopi bon mes, como tambe na Modechi mes pa e trabou voluntario desplega y e honor mereci cu el a haya.

​Recientemente Honorabel Miembro di Parlamento, sr. Robert Candelaria a duna un declaracion den prensa, den cual e la comparti cierto preocupacionnan encuanto e vacaturanan na Arubahuis. Minister Plenipotenciaro, sr. Guillfred Besaril, a tuma nota di e relato den prensa y a duna e siguiente reaccion.
 
“Den prensa mi a tuma nota di un relato caminda Honorabel Miembro di Parlamentario, sr. Robert Candelaria di partido AVP, den cual e ta insinua cu den porta di eleccion gobierno di Aruba lo tin pensa di yena Arubahuis cu trahado. Mi ta kere ta na su luga pa recorda Sr. Candelaria cu contrario na su partido, Gabinete Wever-Croes si ta tuma gobernacion na serio y semper a tuma pasonan conforme ley na beneficio di pueblo di Aruba en general. Contrario na su gobierno, Gabinete Wever-Croes si a sa di baha gastonan di personal mucho prome cu esaki tabata un exigencia di parti di Hulanda.

E unico punto cu Sr. Candelaria a menciona corectamente den su relato ta e metanan primordial di Arubahuis cu ta pa representa Gobierno, Conseho di Minister y departamentonan gubernamental di Pais Aruba na Hulanda. Su insinuacion cu Gabinete Wever-Croes a yena Arubahuis cu hende ta totalmente incorecto y falso. Y cu gobierno lo kier haci esaki dilanti porta di eleccion ta un ridiculez completo! Realidad a mustra cu esaki tabata e practica di su partido tempo nan tabata den gobierno, pues mi ta compronde for di unda Sr. Candelaria su pensamento ta sali.

Como Minister Plenipotenciario mi ta trahando desde comienso di gobernacion hunto cu Departamento di Recursonan Humano (DRH) riba un plan di restructuracion pa Arubahuis. Por cierto si Sr. Candelaria ta pone mas atencion den e reunionnan di parlamento durante tratamento di presupuesto y den noticia na Aruba, lo e ta bon informa di esaki. Restructuracion di un departamento gubernamental no ta algo cu por wordo realisa sin mas. Tin hopi aspecto cu mester tene na cuenta, entre otro e aspectonan legal, laboral y e factor humano. Arubahuis ta conta cu empleadonan cu pa hopi aña a sirbi Aruba dignamente y ta merece respet y gratitud inmenso pa nan labor desplega. Sr. Candelaria como ex. Alto Inspector den tempo di reorganisacion di Aruba su Cuerpo Policial, mester por tin un bon idea di kico esaki ta trece cune na momento cu no tene cuenta cu e componentenan aki den menciona. E ta un experiencia cu awe mi ta uza pa hunto cu DRH nos guia e proceso den forma exitoso. Pues mi ta invita Honorabel Miembro di Parlamento na apoya e trahadornan di Arubahuis na momento di trata e presupuesto di nos Pais proximamente.


Manera mi a declara anteriormente, COHO a cambia e dinamica di operacion di Arubahuis caminda di awo en adelante mester cumpli cu tareanan cu antes no tabata wordo exigi di nos personal. Hunto cu DRH nos ta evaluando kico lo ta e caminda mas efectivo pa por cumpli cu e tareanan nobo di Arubahuis. Nos ta evaluando e reeducacion of -orientacion profesional di e personal existente y solamente si ta altamente necesario, lo tuma personal nobo den servicio. Arubahuis ta conta cu un personal sumamente capacita cu merece e respet di no solamente Sr. Candelaria, pero di tur cu ta 
 
carga responsabilidad den Staten di Aruba. E hecho cu tin personal ta baha cu pensioen y/of ta probecha di e oportunidad pa bay cu VUT ta algo cu mi no tin den mi man. Mi ta agradecido na e personal cu pa hopi aña a labora na Arubahuis. Den caso di posicionan vacante, si e ta cay den e plan di formacion nobo acorda cu Departamento di Recursonan Humano, lo cana e caminda segun procedura pa e vacatura ser yena.

Mi ta consciente cu campaña a cuminsa pa Sr. Candelaria y cu tiramento di lodo of insinuacionnan muy probablemente lo ta parti di e strategia cu partido AVP lo aplica. Ami no lo participa den e tipo di politica aki y mi ta invita Honorable Miembro di Parlamento, Sr. Candelaria, pa e tambe pone politica bieu un banda, purba un politica limpi y honesto y mi kier recorde riba Santiago 4: 11-12. Guillfred Besaril semper a traha na bienestar di pais Aruba, cumpliendo cu tur reglamento y ley y mi lo sigui traha den forma honesto y transparente na bienestar di Pueblo di Aruba en general”. Minister Besaril a termina.

FASE a bira posibel danki na e sacrificio colectivo cu aparato gubernamental a haci. E sacrificio y entrega di 12.6% di salario di empleadonan publico, e entrega di 25% di salario di e Minister- y Parlamentarionan, a haci posibel cu desde april 2020 tin un yudansa di AFL 950 yegando cerca tur hende cu a perde y cu ta perdiendo nan trabou.

​Minister Glenbert Croes awe kier bisa tur DANKI pa e generosidad y cooperacion. Orguyoso di e pueblo aki cu a sali duna un man na un ruman. Hopi di nos prohimonan a perde nan propiedad sea ta cas of auto. Hopi ta esunnan cu a wordo saca for di nan apartamento. Hopi ta e mayornan cu no por a pone pan riba mesa pa nan yiu. Hopi ta nos conciudadanonan cu ta pasando hopi necesidad. P'esey FASE ta asina importante pasobra sikiera e asistencia financiero di emergencia aki ta mitiga e necesidad cu hopi di nos conciudadanonan ta bibando.

​Un biaha e mandatario ta expresa: "Danki pa a yuda un otro cu a perde tur cos. E sacrificio cu boso ta haciendo lo tin e maximo recompensa no solamente pa bo sino pa henter nos pueblo. Danki na e sacrificio colectivo, e recompensa lo bin di universo pa nos Pais pasobra ningun caminda na mundo un Pais a sali asina lihe pa yuda su hendenan, y paisnan mucho mas grandi, fuerte y poderoso cu nos. Aki na Aruba a introduci a FASE, COVID Bijstand, a aumenta pakete di cuminda y Loonsubsidie pa purba alcansa mas hopi hende cu ta posibel cu a bira victima di un crisis sin precedente cu a azota nos Pais."

Diabierna 12 di maart mainta, Prome Minister Evelyn Wever-Croes hunto cu colega Minister Xiomara Maduro, a bishita Scol Basico Colegio Bon Bini den cuadro di celebracion di 45 aña di Himno y Bandera di Aruba. E ministernan a wordo ricibi pa muchanan contento y entusiasma hunto cu Cabesante di Scol Juffrouw Sherissa Tsu y docentenan. 

Manera ta custumber durante e siman di 18 di Maart, e mandatarionan ta scoge diferente scol pa bishita pa tira un bista con e muchanan ta preparando pa cu e dia special aki. Aña pasa debi na Covid, Gobierno a cancela e bishitanan na e scolnan pero e aña aki a dicidi di continua cu esaki siguiendo tur protocol di DVG.

​Ta di admira cu nos scolnan ta pone asina tanto tempo pa haci un bunita celebracion asina pa eleva nos himno y nos bandera. Prome Minister ta sumamente impreciona di mira e animo cu tin na Colegio Bon Bini pa cu nos dia nacional, e atencion di e docentenan, e interes di cada mucha y tur e preparacionnan pa cu Dia di Himno y Bandera. 

​“Un danki na e cabesante, na tur docente y na e alumnonan pa e gran amor cu nan tin pa Aruba. Mi kier duna un elogio grandi na e maestronan pa a tuma tempo pa siña nan klas e historia di nos himno y bandera. Dia 18 di maart, Aruba ta celebra un di e logronan grandi di Betico, of cu Betico a contribui na nan grandemente, esta nos Himno y nos Bandera, simbolonan di union y identidad di un pais. Tambe e hecho cu awe Aruba tin su propio gobierno, su propio ministernan, su propio Parlamento, su propio moneda. Y tur esaki a inculca e sentimento di orguyo den nos Arubanonan. E meta di Gabinete Wever-Croes ta pa e historia aki hamas wordo lubida”, Prome Minister Evelyn Wever-Croes a expresa.

​Diasabra atardi, Gobierno di Aruba hunto cu Parlamento di Aruba a conmemora 1 aña di Covid na Aruba. Esaki a tuma luga dilanti di Bestuurskantoor na unda cu a tuma luga un ceremonia floral pa recorda e 78 personanan cu a perde nan bida den e aña aki na Aruba pa motibo di Covid. Despues cu Ministernan di Gabinete Wever-Croes y Parlamentarionan di nos pais a pone flor den lama pa conmemora esnan cu a fayece di e pandemia aki y a cende candela di un antorcha pa recorda e impacto di Covid riba nos pais, Prome Minister a duna un discurso y a desea forsa na tur famia cu a pasa den e dolor aki.
 
Despues di e ceremonia cu a tuma luga dilanti Bestuurskantoor, a sigui un programa special di un resumen di e aña cu a pasa y di oracion pa brinda sosten y forsa na tur famia cu a pasa den e tristesa grandi aki. Por mira e programa aki riba pagina di Facebook di Gabinete Wever-Croes. 
 
Prome Minister Evelyn Wever-Croes: “Nos a experiencia momentonan hopi duro, pero e bunita tabata e solidarismo cu nos comunidad a demostra. Cu mas determinacion cu nunca nos lo bringa e pandemia aki, pa Aruba por progresa. Pasobra nos ta stima nos mes, nos ta stima nos famia y nos ta stima Aruba”.

​Diasabra ya ta marca un aña caba cu Aruba a conoce su prome 2 casonan di COVID-19, Aruba a bira parti di e pandemia mundial y nos bida a cambia. Esaki tawata e aña mas duro den historia di pais Aruba. Un anja dificil, cu hopi stress la nos tur, cu hopi tension y intercidumbre. Nos tur a sinti e effectonan y Covid-19 a causa hopi destruccion den tur sentido di palabra. Pesey Gobierno lo conmemora e fecha di 13 di maart 2021 pa trece un reflexion riba tur locual pais Aruba a pasa aden, asina Minister di Turismo, Salubridad Publico y Deporte Sr. Dangui Oduber a trece dilanti.
Minister Dangui Oduber tabata tin un rol hopi importante durante e pandemia mirando e carteranan di Turismo y Salubridad cu tabata esnan cu a wordo afecta directamente door di e pandemia. E mandatario conhuntamente cu ful e Crisis Team, conseho di minister y bou liderasco di Minister-President a haci tur locual tawata den nan alcanse pa cuida y proteha e comunidad di Aruba.
Pa prome biaha den historia, Aruba a conoce un toque de queda, shelter in place y un lockdown na nos frontera. Tabata desicionnan dificil pa tuma, pero mester a pone bida di hende prome sabiendo cu esaki ta bin a cambio di nos economia. Gobierno semper a haci su maximo esfuerso pa trece e balansa entre salubridad y economia. Hopi tabata esnan cu a perde nan trabou debi na e pandemia y ta esnan cu a perde nan sernan keri debi na Covid-19.
 
Gratitud
Minister Oduber kier a gradici di curason tur esnan cu ta traha den cuido. Danki na boso esfuerzo y compromiso pa brinda un excelente cuido y servicio na patientnan. Danki na tur frontliners cu tatwata na trabou percurando pa Aruba por keda draai. Danki na coleganan di ministerio TVS, mi colegnan minister, miembronan di crisis team, departamento di salud publico (DBZ- team brond- contacten onderzoek, team isolatie en quaraintaine- taskforce bedrijven- team vacuna) y specialmente na communidad pa e comprension y disciplina demostra den e 1 anja aki.
Nos ta gradicido na bosonan tur. Aruba a demostra union durante e pandemia pa combati esaki.
 
Intensive Care Unit (ICU)
Prome cu e pandemia HOH tabata tin solamente 11 unidad di cuido intensivo, Minister Oduber a percura pa aumenta e capasidad cu 22 unidad di cuido intensivo.  Actualmente HOH tin 33 unidad di cuido intensivo cada un cu nan mesun ventilator. Tambe e mandatario a percura pa aumenta e personal di cuido cu 108 personal extra di AMI. Na ningun momento HOH a yega na nan maximo capasidad di e ICU y semper por a duna e mihor cuido na e pashentnan. Den un aña di COVID-19 un total di 457 pashent a keda hospitalisa y lamentablemente e virus a cobra bida di 77 persona. Sigur esaki tawata esun mas doloroso pa nos tur. 
 
Aruba Health App
Nos obstante tur e retonan nos a pensa con nos por percura pa por recupera nos turismo den medio di un pandemia. 
For di dia cu Aruba a habri su fronteranan na juli 2020 Aruba a lansa e Aruba Health App. Cu e app aki turistanan y localnan cu ta yega Aruba ta download e app y ta haya tur informacion di nan PCR test dentro di 6 ora den manera digital. Aruba a wordo reconoci mundialmente pa nos protocolnan, nos innovacion y sigur e Aruba Health App. Awor por uza e mesun app aki pa registra pa haya bo vacuna. Minister Oduber ta satisfecho cu atrobe Aruba ta frontrunner y pionero pa innovacion.
 
Aruba Health & Happiness Code
ATA a prepara e Aruba Health and Happiness Code, a percura pa certificacion tur e establicimentonan caminda nan ta demostra na e turista cu nan establicimento ta cumpli cu tur rekisitonan di COVID-19, manera un bon higiena y proteccion. Esaki a sirbi como un punto importante di mercadeo cu a mustra e turista cu Aruba ta un destinacion sigur pa cu COVID-19.
 
Vacuna
Aruba ta un di e paisnan afortuna na mundo cu tin acceso na e vacuna contra COVID-19 como nos ta parti di Reino. Recientemente e di dos lote di vacunanan a yega Aruba, te cu awor Aruba a ricibi 24.570 vacuna for di Hulanda. Tin mas di 30 mil persona cu a registra pa haya e vacuna di cual 11 mil hende a haya e vacuna caba. Minister Oduber ta haci un yamada na comunidad pa sigui registra pa participa den e campaña nacional di vacunacion.
Minister Dangui Oduber ta gradici comumidad di Aruba pa nan pa nan pasenshi y disciplina durante 1 aña hopi dificil. Hunto nos lo logra vence e pandemia aki. Ban sigui vacuna Aruba, ban sigui salba bida y ban prospera.
 
Finalmente minister Oduber a bisa cu Covid-19 a pone nos tur para keto y reflexiona con nos mester balora tur loke nos tin riba e pais aki. Nos lo sa di bounce bek, Aruba ta un pais resiliente, fuerte y den union, paz y harmonia nos lo mira bek un futuro briyante pa un y tur cu ta biba riba e pais aki.